Termino Femicidio ta keda uzá durante protestanan grandi na Latino Amerika.

Hulanda: Den programa di “podcast” ku e reportero hudisial Saskia Belleman huntu ku Wilson Boldewijn riba e tópiko Femicide, Saskia a splika ku a hasi un enkuesta nan skolnan i e resultado di esaki tabata ku 1 di 10 hóben ta pensa ku nan por dal un hende muhé pa un òf otro motibu. Saskia a bisa ku naturalmente, e hóbennan aki tur tabata hòmber.

Segun Saskia, netamente e pensamentu aki ta sigui desaroyá segun e hóbennan aki ta kresé i ta kondusí na “femicide”. “Femicide” ta e termino ofisial ku ta keda uzá na mundu ora un hòmber mata un muhé.

Hopi hòmber ta pensa ku muhé ta nan propiedat i komo tal, nan por hasi kiko ku nan ke, ora nan ke ku nan. Saskia a splika ku na Hulanda, kada 8 dia, un muhé ta keda matá pa un hòmber na Hulanda. Mayoria di e kasonan tin di haber ku e hòmber, no por aseptá ku e muhé ke terminá e relashon òf paso e muhé a kòrtá su orea.

E problema aki, ta mas serka di nos ku nos ta pensa, Saskia a bisa. Hopi biaha nos tin e persepshon ku hòmbernan Hulandes ta mas trankil ku hòmbernan di manera Spaña, Mexico i Fransia kaminda tin un kultura di machismo.

Na paisnan aki, tin mas protesta. Protestanan grandi i mas visibel. Bèrdat e paisnan aki tin mas krimen kontra di hende muhé paso nan ta mas grandi i tin un kultura di machismo ta biba. Pero di otro banda, segun Saskia, bo ta mira mas tantu hende ta sali na banguardia di hende muhénan tambe na e paisnan aki. Ta protestanan grandi tin riba kaya durante dianan. Na e paisnan aki, akshonnan ta tumando lugá pa konsientisá e pueblo tokante e termino “femicide” i kiko esaki ta nifiká. Segun Saskia, ora bo duna un problema un nòmber, esaki ta keda rekonosé i ta mas fásil pa komo pueblo pa bo yega na un solushon e ora ei.

Saskia a splika ku na mei 2022 tabatin un protesta na Hulanda kaminda 3400 a manifestá pa para “femicide”. Kisas bo ta pensa ku ta un kantidat grandi di hende pero esaki no ta nada di kompará ku otro paradanan di protesta ku tin manera “black live matters”.

Mester kuminsá konsientisá nos muchanan for di chikí pa respetá otro. Prinsipalmente respetá e muhé kual engeneral, ta keda mirá komo e sekso di mas debil kual ta pone kisas ku e hòmber ta pensa ku e por dal e, ora e ke. No por ta asina ku un di kada 10 hóben ta pensa ku nan por dal un muhé. Un hóben ta dimas, segun Saskia meskos ku kada “femicide” ta di mas.