Back to Top
Vigilante banner image

10 kurpa sin bida lokalisá derá den bibienda na El Salvador


May 18, 2021 • 2 minüt pa lesa

Bibienda den kua por tuma 1 luna pa kaba ku e investigashonnan nesesario.

SAN SALVADOR – Forensenan di Fiskalia General di El Salvador a lokalisá un total di 10 kurpa sin bida derá den dos diferente graf klandestino den interior di un bibienda na e munisipio di Chalchuapa, na Santa Ana.

Segun e fiskalia, e restunan lo ta pertenesé na shete muhé, un mucha muhé di edat di shete aña i dos mucha hòmber di dos i di nuebe aña.

Osorio Chavez a keda kapturá dia 8 di mei último, komo e sospechoso prinsipal di asesiná dos muhé den su bibienda. Tabata trata aki di un mama ku yu.

Dia 12 di mei último, un tribunal di Santa Ana a ordená pa esaki sigui keda detené.

Na momentu ku e finalisá ku su oudiensia, Osorio no a respondé na e preguntanan di prensa. Tampoko su abogado a hasi ningun deklarashon u no a respondé na yamadanan hasí.

E fiskalia ta kalkulá ku e investigashonnan den bibienda di Osorio lo por dura un luna. Outoridatnan ta sospechá ku e sifra di víktimanan lo por ta ainda mas grandi. A establesé entre tantu ku tin un total di shete graf klandestino mas na e sitio. Segun e fiskal, e kurpanan aki lo por tin entre 1 i 2 aña na e sitio.

Segun outoridatnan, Osorio tabata miembro di Polis Nashonal Sivil, pero a keda destituí na aña 20”5 despues di keda akusá di un komportashon seksual agresivo. Segun e komunikado, Osorio a rekuperá su libertat despues di kumpli un kastigu di 5 aña pa e delitu.

Segun tur kos ta indiká, e hòmber aki lo ta sikopata. I segun e minister di hustisia di e pais, Gustavo Villatoro, tin nesesidat di krea un unidat pa atendé e perfilnan sikológiko aki.

Den oranan di fin di siman, outoridatnan a realisá otro dies detenshon mas, pa posibel vínkulo ku Osorio den 13 asesinato. 

Login