Ministernan no ta organisá rueda di prensa mas. Esaki alabes ta kousa ku prensa ta bai mas investigativo. 

Fòrti,– Aktualmente direktorado di komunikashon enkargá ku organisashon di konferenshanan di prensa tin 108 dia sin organisá un konferensha di prensa pa gobièrnu. Mesora a intentá na drenta den kontakto ku direktora interino Reyeane Goilo si tin un konferensha di prensa planiá den futuro, pero te ainda no tin kontesta.

Ta trata di un situashon basta preokupante. Gobièrnu di Kòrsou simplemente no ke duna kuenta i rason na miembronan di prensa. Esaki por dedusí for di desaroyonan resien kon ta komuniká ku prensa. For di despues di Covid-19 mandatarionan por medio di direktorado di komunikashon a limitá prensa pa hasi solamente 2 pregunta na ministernan na mando. No solamente esaki ta afektá abilidat pa prensa “chèk, dòbel chèk i bolbe chèk”  deklarashon nan di ministernan. Ta keda notabel ku preguntanan “muchu” investigativo ta wòrdu interpretá komo falta di rèspèt den direkshon dje mandatario.

Pa loke konferenshanan di prensa den 2026 organisá den sala Jerry Lasten, e situashon simplemente ta birando pió. Den e promé 9 lunanan di aña solamente 9 konferensha di prensa a keda organisá den e sala multifunshonal. Kaminda e sala a keda renobá na mei 2021 ku intenshon pa organisá konferenshanan di prensa, seshon nan di Fòrti Habrí, seshon nan di webinar i otro seshon nan di gobièrnu. Ta notabel kon ningun dje seshon nan ariba menshoná ta keda organisá i e sala ta solamente disponibel riba aprobashon di direktorado di komunikashon.

Tantu e promé minister di Kòrsou komo e minister di desaroyo ekonómiko a presensiá na 4 rueda di prensa e aña aki. Minister di tráfiko i infrastruktura i minister di hustisia/BOD tabata presente durante tres rueda di prensa. Alabes minister di asuntunan sosial tabata presente durante solamente dos rueda di prensa. I e minister di salubridat i minister di enseñansa a duna kuenta i rason na prensa solamente 1 okashon e aña aki.

E situashon aki ta tumando lugá den mesun periodo ku tur siman di nobo e direktorado di komunikashon ta publiká komunikadonan “Pa bo Informashon” i podcastnan “Ki Bo Ke Men?”. Pero unabes miembronan di prensa ke mas aklarashon tokante e podcast i/òf komunikadonan emití, ministernan, miembronan di gabinete i representantenan dje direktorado no ta duna aklarashon.

Repartí den tur e ministerionan tin masha hopi tópiko di prekupashon ku ta gritando pa un deklarashon. Den ministerio di SOAW ainda no tin un plan nashonal di desaroyo laboral. I esaki ta apesar ku produkshon laboral na Kòrsou a bai atras den e último aña mirando ku Kòrsou a pèrdè 3 mil obrero den apénas 365 dia. Den ministerio di salubridat ku ousensia di prensa, minister Boekhoudt ta indiká ku entrante 1 di yanüari 2027 empleadonan di kuido den CMC lo traha konforme un CAO nobo. Esaki a kousa ku CMC ke mira entrada adishonal riba 10 mion florin pa finansiá e CAO nobo. Pero ainda Boekhoudt no a publiká su posishon riba esaki.

Esaki ta sosodiendo ku mientrastantu ministerio di hustisia riba su mes ta tratando na solushoná kriminalidat hubenil. Kaminda minister Hato a indiká ku JVO ta un plataforma adekuá pa kombatí kriminalidat hubenil, ainda e aspekto sosial i re-edukashon ta kai pafó dje kuadro legal dje ministerio.

Banda di minister Charles Cooper ku ta promové e kayanan sin buraku, e promoshon nan aki ta tumando lugá pareu ku Kòrsou a registrá mas ku 12 mil vehíkulo nobo riba nos isla na 2025. Alabes plan di ABC Busbedrijf pa spar gobièrnu riba 1 mion florin na transporte eskolar, pa rason nan deskonosí ainda no ta den ehekushon dor di ministerio di enseñansa.

No opstante dje echo ku minister Pisas ainda no ta dunando kara riba e míles di galòn di awa di fekalia ku ta kousando desaster pa nos bida marítimo. Mester remarká ku tin rekomendashon ku desaroyo turístiko ta bai muchu mas leu ku e ministerio manehá dor di minister Roderick Middelhof.  Kon e maneho multi-ministerial ta bai haña forma? Esaki lo keda divulgá via di un komunikado kòrtiku i konsiso por medio dje gabinetenan i/òf direktorado di komunikashon di gobièrnu.