Direktiva CRA a bati alarma

Punda—Di akuerdo ku un enkuesta kordiná pa E Asosashon di restorant na Kòrsou, CRA, 111 mion florin na benta  a bai pèrdí durante period di Covid 2020. Esaki sin efektonan di 2021 ku ta oumentá e suma ku lo mínimo 45 mion florin mas.

Den un entrevista durante e programa “Ekonomia” di Vigilante ku anfitrion  Lilo Sulvaran, miembronan di direktiva Zeno Circkens i Martin den Dulk a presentá i diskutí riba e sifranan. Segun den Dulk, kende ta unu dje fundadonan di CRA, “data durante Covid ta sumamente importante”. I netamente ta lokual e enkuesta interesante a revelá. Aparte di a pèrdè kasi 111 mion na benta ta indiká ku por lo ménos 6 mil persona a pèrdè nan trabou

Na Kòrsou en total tin alrededor di 340 restorant ku ta perkurá pa kasi 240 mion florin na benta anual. Kasi mitra di nan benta a bai pèrdí durante Covid 2020. E enkuesta alabes a midi prestashon den benta di restorantnan ku enfoke riba merkado lokal i restorant riba enfoke pa turista. Por lo general tòg e restorantnan riba enfoke di turismo a risibi mas daño debí na efektonan di Covid i lockdown. Asina durante e promé lockdown, restorantnan ku enfoke riba turista a pèrdè mas ku 75% di nan benta miéntras esnan riba enfoke lokal a pèrdè 67% di nan merkado. A keda konfirmá ku  efektonan di Covid ta mas pisá durante periodo di lockdown unda mayoria dje benta ta bai pèrdí.

Pa lokual ta trata empleo, e konsekuenshanan tabata devastador. Despues ku ekonomia a kuminsá ta drechando i restorantnan tabata sali fo’i un reseshon na 2019, 2020 tabata un desaster, Durante promé kuartal, tur restorant tabatin kasi okupashon di empleo na 100%. Ya pa final di dos kuartal, esta di aprel 2020 pa yüni 2020 e restorantnan a tene nan empleo na 72% sigui pa mantenshon di 63% pero debí na spekulashon i insiguridat pa último kuartal empleo den restorantnan a baha te na33%

Segun sifranan nashonal un kantidat di 16 mil persona ta traha den sektor di hotèl i horeca, for di kual 7 mil ta empleá dirèkt den restorantnan. Durante Covid 2020, restorantnan mester a baha empleo ku 69% i redusí e kantidat di persona empleá den e sektor di 7000 pa 2300. Segun Zeno Circkens, e bahada den empleo tabata un problema mas grandi pero bo ta pèrdè tambe “learning curve”, esta eksperensha ku ta bai laga e restorantnan manera bon koki i waiter. Ademas hinter bo struktura logístiko tambe ta risibi un daño struktural ku ta bira difísil sigui ópera bou di mantenshon di kostonan efektivo. Pa por a sobrebibí tur restorant mester a baha i korta den gastunan di operashon. Prinsipalmente hür, Aqualectra, kompra i merkadeo. Lokual tabata remarkabel ta solamente 25% dje operadónan tabata por a logra skapa pagonan di hür. 40% a deklará durante e enkuesta di a baha riba nan kostonan di kompra.

Segun den Dulk i Cirkens, e situashon ta malu ainda. E di dos lockdown tambe a yuda trese mas daño. CRA te ainda ta e úniko organisashon komersial ku a tene un enkuesta den su sektor pa por midi efektonan di Covid. Manera ta konosí, e asosashon alabes a laga produsí un vidio pa stimulá e komunidat pa bai bakuna i yuda na rekuperá ekonomia di Kòrsou.