Neysa Isenia dunando splikashon na prensa.

Otrobanda,– Por sierto un resultado notabel tabata e echo ku solamente 194 kas a keda rekonektá na e ret di Aqualectra kaminda a bin diskubrí ku vários kliente no tabata mustra interes pa establesé un konekshon bèk ku e kompania di utilidat.

Na òktober 2024 Aqualectra den kordinashon ku Ministerio di SOAW a establesé un kampaña agresivo pa rekonektá awa i koriente bèk na kasnan kaminda tin debenan supstansial relatá na problema di pago. E kampaña tabata indikativo ku alrededor di mil kas no tin konekshon di koriente ni awa. 4 luna despues ku inisio dje kampaña a sali na kla ku solamente 425 kliente a reakshoná riba e kampaña kaminda finalmente solamente 194 kliente a wòrdu rekonektá bèk na e ret di Aqualectra. Di e klientenan ku no a reakshoná a sali na kla ku e klientenan aki nunka a reakshoná riba kartanan di Aqualectra i tampoko no tabata kontestá yama di e kompania, pues tabta difísil pa haña kontakto.

Entretantu Aqualectra a publiká un lenk kaminda tur kas sin awa i/òf koriente por apliká ariba. Abase di e informashon suministrá lo bai evaluá i tuma kontakto ku kada kliente mas tardá riba 15 di mart próksimo. Tur kliente ku ta bini na remarke, ta risibí un sita pa entregá demas dokumentashon i fmra e kontrakto pa por hasi rekonekshon.

Notabel ta e echo ku solamente 19% di e kasnan sin koriente a kumpli ku tur e rekisitonan imponé. Segun informashon di e 425 klientenan kende inisialmente a registrá a sali na kla ku algu mas ku 100 kliente nunka a akudí na Aqualectra pa nan sita i 90 kliente a akudí na ofisina dje kompania sin dokumentashon. Di e konekshon nan ku si a keda rekonektá, esaki lo a kosta Aqualectra alrededor di 695 mil florin.