Back to Top
Responsive image
E korant di pueblo

2 aña pa hòmber ku a choka mama di yu lag’é pèrdè konosementu


May 29, 2021 • 3 minüt pa lesa

 

Nieuwe Haven— Korte a trata kaso kontra di e hòmber H.E. unda ku e la splika ku e ta arepentí di loke ku e la hasi pero ku tabata paso e dama no a indiká na dje ku e tabatin un pareha nobo e la haña rabia i p’esei e kosnan a sali for di man.

Tin dos akusashon den kontra di H.E unda ku e promé akusashon ta ku alrededor di 12 di Òktober di aña 2020 akusado a bula bentana i bai paden pa e choka un dama kende ta mama di un di su yu nan te ku e dama a bin pèrdè rosea. Despues  ku e akusado a mira ku e dama no tabata reakshoná mas e la bandoná e sitio lagando e dama benta abou. E di dos akusashon ku tin den su kontra ta ku den e periodo di 8 te ku 12 di Òktober di aña 2020 lo tabata vigilá òf slùip e dama víktima den un kas bandoná ku tin banda di e dama su kas.

Durante tratamentu di e kaso e akusado a indiká ku na niun momentu no tabata su intenshon di a choka e dama te ku e la pèrdè rosea. E la splika ku e tabata hopi rabia ku e dama paso e dama no a bisé ku e la haña un pareha nobo, sino ku ta e mes mester a bin haña sa esaki. Segun e akusado e la parker su outo na parkeerplaats di e santana ku tin den serkania pa despues na pia e kana bai na e kas bandoná ku tin den banda di e dama su kas. Na momentu ku e tabata den e kas ei e por a mira kon e dama tabata sinta den balkon ku un hòmber i dado momentu e dama a lanta i a sunchi e hòmber. For di e dia ei e la haña un rabia den su kurpa i e rabia a domin’é pone ku e la bai i choka e dama.

Na promé instante fiskal a indiká na e akusado ku na promé instante no tabata sa si ta konsiderá e kaso aki komo intento di asesinato òf homisidio. Pero skuchando e akusado i evaluando e echo nan por konsider’é komo intento di asesinato. Fiskal a bisa ku for di momentu ku e akusado a parker su vehíkulo na e santana pa despues kana bai e kas bandoná i a keda eiden pa 1 ora e por a pensa bon promé ku e la kometé algu robes.  For di momentu ku e la choka e dama te ku e dama a bai for di dje i asta a bandoná e sitio sin ku a yama ambulans òf un persona pa yud’é por nota ku e akusado tabata bon na altura kiko e la hasi. Pues pa e echo nan aki e la pidi wes un kastigu di 4 aña di prizòn di kual 1 ta kondishonal.  Tempu di prueba di 5 aña i “contactverbod” ku e dama i tambe mester risibí guia di reclassering.

Wes a tuma desishon den e kaso unda ku e la splika e akusado ku e ta mira ku e tabata honesto i ta habri pa risibí tratamentu tambe. Wes a indiká na e akusado ku mirando ku e akusado ta un tata di 9 yu e no por bai dun’é un kastigu basta haltu paso e yu nan lo tin mester di dje i tambe finansieramente, mirando tambe ku su trabou a indiká ku e ta un bon trahadó e lo no bai dun’é un kastigu basta haltu. Wes ta di-akuerdo ku fiskal di ku ta trata aki di un kaso di intento di asesinato, p’esei e la duna e akusado kondena di 4 aña di kual 2 ta kondishonal, tempu di prueba di 5 aña i “contactverbod” ku e dama.

Login