Misterio: te ainda ta un misterio tantu na St. Maarten komo na Kòrsou, unda e demas pagonan den benta UTS a bai.

Punda—For di benta di UTS, gobièrnu di Kòrsou komo doño di e kompania estatal a risibi solamente 20% den su kaha, nifikando ku por lo ménos 80 % dje benta tabatin otro destinashon.

Liberty Latin American, na 2022 a paga nan último kota di 53.7 mion na Gobièrnu komo e pago final pa kompra di UTS. Promé ku e pago final a tuma lugá, un kalkulo ta mustra ku den kaha di gobièrnu tabatin solamente 12 mion ku a sobra dje benta di 339.  Den práktika for di 339 mion florin ku a bende UTS, ta solamente 12 mion florin tabata den kaha di gobièrnu, sperando e pago final di Liberty,.

UTS a wòrdu bendí pa 339 mion florin. Na Fiansa mester a deskontá 78.2 mion pero e kompania tabatin na aktivo i kèsh 52.7 mion. Despues di eliminá fiansa i añadí aktivonan riba e suma ta keda 313.4 mion florin. For di 313.4 mion mester a deskontá e di trapi di debe ku tabata kréditornan na 42.6 mion i fondo di penshun atrasá na 85.8 mion florin. Ta keda 185 mion florin. Pero UTS tabatin mas debe ku nunka miembronan den Hunta di Komisario no a revelá na gobièrnu. Entre nan tabatin 6.1 mion na impuesto, 15.2 na debenan di konseshon i 6.5 mion na debe den derechinan di eksklusividat.  Ora deskontá e di tres trapi di debe ta keda 157.2 mion florin ku ainda no por a bai den kaha di Kòrsou.

For di e 157.2 mion florin, gobièrnu di St. Maarten a claim 19.5 mion florin komo sosio den UTS. Kòrsou a keda ku 137.6 mion florin riba “papel”. Di e 137.6 mion ku mester a bini Kòrsou despues di a paga tur kos atrasá di UTS, Liberty a reserva 53.7 mion florin pa subi un kuenta intermediario ku a kanselá na 2022. Sin e plaka riba e kuenta intermediario, Gobièrnu di Kòrsou mester a risibi segun kálkulonan, 137.6 mion deskontá 53.7 mion florin ta bira 83.9 florin. Ta konosí ku di e suma aki, 66 mion florin a bai Curaçao Medical Center sin ku niun konfirmashon eksakto a yega pueblo di Kòrsou. Despues di deskontá 66 mion florin ta keda 17.9 mion florin. 6 mion florin mester a bai bek Flow, lokual segun konteo di Vigilante a keda 11.9 mion florin. Huntu ku e 53.7 mion florin ta totalisá 65.6 mion florin ku ta 20% di 339 mion florin.