Gilbert Martina

Punda— Maneho di likides na CMC ta e problema mas grandi konfrontando e instituto di kuido. Esaki a keda konfirmá pa direktor di CMC, Gilbert Martina, eks minister di Salubridat Públiko Dorothy Janga i minister interino Javier Silvania.

CMC, referiendo riba nan karta 2 di mart último, kual a keda publiká tambe den Vigilante na su kontenido, a ekspresá nan prekupashon. Lokual tin CMC na e momentunan aki na bida, ta fleksibilidat di algun kréditor kende no ta ehekutando nan derechinan di kobransa. Despues di un enkuentro ku minister interino di salubridat públiko, kende alabes ta minister di finansa. Na e momentunan aki te ainda, pa 2023 tin 184 mion destiná for di presupuesto di kuido pa CMC. Ta trata di mesun suma pa 2022, kual no a resultá di tabata sufisiente. Ku e aki, e problema di CMC ta bira mas grandi. Na 2022, CMC a risibi 184 mion for di presupuesto di kuido i adishonal 16 mion florin. E 16 mion florin tabata pa paga 85% di salario pa spesialista. E suma total presupuesto pa CMC na 2022 tabata en total 200 mion florin. Entretantu, e problema di e spesialistanan tambe ta bai afektá un ehekushon responsabel di likides na CMC.

Na 2022 a Sali na kla ku hasta e 200 mion no tabata sufisiente. CMC a gasta na kuido di pashèntnan di SVB durante 2022 te ku novèmber 248 mion florin. Te ainda ta trata di un défisit di por lo ménos 48 mion florin. Na 2021 CMC a gasta 254 mion pa kuido di pashèntnan di SVB i na 2020 222 mion. Ta lógiko ku e suma menshoná pa 2023, lo no ta sufisiente tampoko. Aparte di esaki, mester konsiderá oumento di inflashon den kostonan médiko. Segun Minister Silvania di Finansas, lo “monitor” e situashon na CMC pa averiguá si mester evaluá un sistema di intervenshon pa garantisá salubridat públiko nashonal. Na 2022 ta kalkulá e défisit di tabata 48 mion i na 2023 e minister a duna un kompromiso pa duna 20 mion florin. Ainda tin un défisit ta keda kologá di 28 mion florin.

Un otro problema ta ku pa motibu di Presupuesto di Kuido defisiente, no por kubri tur gastu di BVZ pashèntnan ta okashonando e.o. pèrdida grandi na CMC di alrededor di 124 mion florin. Aparte di e insufisiente fondo den presupuesto di kuido, CMC ta sigui karga kostonan èkstra di indokumentadonan sin seguro d 16 mion florin di Covid. Durante na último rueda di prensa, gerensha di CMC a ekspresá nan prekupashon tambe riba kostonan haltu di laboratorio, ku for di inisio di CMC a yega 200 mion florin. Téknikamente, por konkluí ku CMC ya ta den posishon di bankarota, si apliká e prosedernan atministrativo di solbabilidat i kapital propio.

E problema grandi di CMC ta su debenan, okashoná prinsipalmente pa kambia e desishon di Amstel Pa Otrobanda. Segun direktor general di CMC señor Gilbert Martina e hür mensualmente ku CMC mester paga ta 3.8 mion florin di kual mas ku 1.5 mion florin ta pa paga e dos debenan ku gobièrnu tin na Hulanda i for di aprel 2020 no por a paga esaki mas. Pa lokual ta trata e parti dje debe lokal, SVB tur luna ta kita 800 mil  florin pa paga na e konsorsio lokal. Tambe señor Martina a splika ku 121 mion florin ta dirèkt konsekuensha na e kambio di lokalidat di tereno Amstel bai Otrobanda. Te ainda, parlamento no a logra sigui ku un proseso di enkuesta parlamentario riba e kostonan iresponsabel den konstrukshon di CMC.