Back to Top
Responsive image
E korant di pueblo

21 di mart Flow/Liberty mester paga gobièrnu último 53 mion


February 16, 2021 • 3 minüt pa lesa

Mal desishon: aparte di a logra saka poko benefisio na likides pa gobièrnu, benta di UTS na Flow te ainda ta un desaster pa klientenan di Kòrsou.

Punda—Gobièrnu di Kòrsou ta pendiente un pago ku Liberty/Flow mester kompletá pa bira doño apsoluto di UTS. Ta trata di 53.3 mion ku ta apuntá komo “debedor” riba kuenta di likides di gobièrnu pa final di 2020. Segun Minister di Finansas, Kenneth Gijsbertha.

E 53.3 mion florin ta forma unu dje úniko partinan kuantioso ku gobièrnu lo risibi durante 2020 for di su kompanianan anónimo, anke den kaso di UTS ta trata di benta kompleto di su akshonnan.  Demas kobransa pendiente komo debedor anotá riba maneho di likides tin Curoil pa 14.5 mion florin, IUH (Aqualectra) pa 31.6 i OBNA pa 15.8 mion florin. En total gobièrnu di Kòrsou tin anotá un suma di kasi 155 mion florin na debedornan kual 130 mion ta prosedente for di kompanianan anónimo di gobièrnu.

Pa lokual ta trata e pago di Flow, na Mart aki e transakshon final ta tuma luga i Flow Liberty por anunsiá su mes komo akshonista solitario di akshonan ku tabata den bolsa di UTS. Pero e kestion ta sigui kuantu sèn realmente a bai den kaha di gobièrnu dirèkt, despues ku 60 mion dje benta a wòrdu inyektá den HNO pa por finansiá operashon di Curaçao Medical Center. Na 2019, Kòrsou a bende UTS na Flow Latin American Cables pa 339 mion florin. For di e benta neto di 142 mion florin (brutu 339), Kòrsou a risibí 72 mion for di kual 66 mion a bai pa CMC por finalisá fase di implementashon.

Segun e último rekuento riba benta di UTS, a bende e kompania pa 339 mion florin. 78.2 mion florin a bai na re-pago di fiansa. Riba esaki mester añadí 52.7 mion na aktivonan di likides, kual ta duna un suma brutu di 313.4 mion. For di 313.4 mion florin mester a deskontá 85.8 mion pa fondo di penshun mas 42.3 mion pa adishonal responsabilidat kreditorio. A sobra tambe un bolsa di aktivo a korto plaso di 27.8 mion florin kual finalmente a duna un resultado neto di 157.2 mion kual St. Maarten tabatin derechi riba 19.5 mion florin i Kòrsou 137.6 mion florin. Segun kálkulonan di Vigilante, for di e 137.6 mion, 53.7 mion ainda falta pa Liberty paga e kota final dje kompra. Ta keda 83.9 mion florin for di lokual rumornan ta indiká ku Gobièrnu a manda 66 mion florin direkshon Suzy Camelia pa finansiá operashon di CMC pa kapital sirkulante. Tin otro informe ku ta 54 mion florin a bai pa CMC. Esaki finalmente por duna un indikashon ku for di e 339 mion florin na benta di UTS, riba un kuenta “somewhere” na Banko Sentral a sobra entre 29.9 mion pa 43.9 mion florin.

Un otro vershon ta indiká ku den e dil ku Flow Liberty, UTS a firma  ku for di e 72 mion florin riba escrow, Kòrsou a risibí solamente 10 mion na 2020. Segun Minister di Finansas Kenneth Gijsbertha e pago di e 10 mion a tuma lugá na final di mart 2020, pero pa rason deskonosí Kòrsou mester a manda 6 mion bek pa Liberty. Aparentemente tabata pa motibu di valuashon robes di e aktivonan riba balansa di UTS na momento di benta. E benta di UTS, miéntras Kòrsou tabata luchando no a yuda riba maneho di likides.

Entretantu Flow ta operando e kompania di telekomunikashon. Pa lokual ta trata e servisio doméstiko, míles di kliente a keda desepshoná pa e mal servisio di Flow. Prinsipalmente pa lokual ta trata e kambionan di “box”. E kompania a atkerí servisionan di tersera parti pa yuda nan ehekutá e kambionan pero kos a pega formalmente.

Login