Sera: hopi negoshi for di aprel 2020 a sera nan portanan despues ku gobièrnu a anunsiá medida.

Punda— E efektonan ku impakto di Covid tabatin riba negoshi chikí entre aprel 2020 pa desèmber 2020 ta deskonosí. E sifranan ta importante pa determiná si e.o. maneho di NOW (Fondo di Sosten) tabata bon distribuí i kon gobièrnu por yuda empresanan chikí mas mihó. Prinsipalmente e kompanianan den Horeca i Turismo.

Manera ta konosí Hulanda durante 2020 a manda un kantidat di 4 tranche di finansiamentu pa totalisá 670 mion florin. 127 mion a bai na finansiamentu di fondo pa sosten na negoshi i mantenshon di empleo (NOW) i pa sosten gastunan fiho tabatin presupuestá un suma di 24 mion florin. En total di 670 mion sektor komersial a risibi 150 mion florin kual ta 22%. Demas 78% gobièrnu a kubri su gastunan operashon manera kréditornan, primanan atrasá, salarionan i demas debe atrasá. E programa di NOW tabata pa mantené kuponan di trabou, pero ku 150 mion florin esei tabata imposibel. E sifranan eksakto tampoko no ta konosí kuantu kompania por a mantené empleo via di NOW. Gobièrnu di Kòrsou a paga NOW i keda sin midi.

Promé ku Covid a drenta na mart aprel, Kòrsou ta konta  ku forsa laboral di 73 mil persona. 58.000 tabatin un empleo miéntras 15.000 tabata desempleá semi aktivo, esaki debí ku den nan seno tin esnan kende ta “empleo individual”. Di e 58 mil empleo, mester dedusí 4 mil ámtenar ku por lo pronto, no mester di sosten pasobra fondonan risibi di Hulanda ta garantisá nan salario, anke Hulanda a imponé un kondishon pa gobièrnu baha 20% di su gastunan. A keda 54 mil empleo ku mas profundo nos a drenta reseshon tambe a pèrdè nan kupo. Segun e modelo Turístika apliká pa MEO, sin duna sosten finansiero na sektor komersial,  un kantidat di 14.000 persona lo a pèrdè nan trabou. Gobièrnu a duna 22% di sosten, lokual por dedusí ku e desempleo korelá na Turístika ta 88% di 14.000 persona ta bira 12.300 desempleado. 12.300 huntu ku e 15.000 desempleado pre Covid ta yega na un bolsa di desempleo di alrededor 28 mil persona sin trabou na Kòrsou. Debí ku MEO i Servisio di Labor Nashonal no tin e sifranan eksakto, por konkluí ku na e momentonan aki desempleo na Kòrsou ta sirkulá entre 38% pa 41% di e forsa laboral.

E tarea pa gobièrnu pa mantenshon di salario ta bira e ora ei 12.300 persona mas 15.000 sin empleo pa un total di mantenshon na 27.300 persona. Un alternativa imposibel pa mantené. E diskushon aktual ta kon sektor komersial tei sobrebibí sin aktividat ekonómiko debí na restrikshon imponé pa gobièrnu di Kòrsou debí na Covid-19. N’e momentunan aki, gobièrnu di Kòrsou, minister di finansas, hustisia i ekonomia ta kontra pa sektor komersial kita trahadó, pero na mes momentu nan no tin e kapasidat pa trese un solushon adekuá manera demas pais na mundu ta hasiendo. Dokumentonan no ofishal ku ta sirkulando den medionan di komunikashon ta mustra den kompensashon di salario, lokual ta un pasio kostoso i a korto plaso. Epidemiologonan mundial ya a konkluí ku Covid tei dura mas ku 1 aña pa logra un nivel di bakunashon responsabel. E sosiedat  ku logra tene nan mes for di e impakto di Covid tin por lo ménos 9 luna di inaktividat ekonómiko.