Rumor: Minister di Salubridat Públiko, Dorothy Janga, a desmentí rumornan di baha komo minister. CMC, ta birando un problema polítiko pa MFK.

Otrobanda—23 di Novèmber próksimo, Curaçao medical Center ta presentá nan kuenta anual. No ta konfirmá si ta trata di 2020 so òf ta inkluí 2021 tambe aden, kual último ainda ta den ouditorio. Pero riba e dia en kestion, gerensha di e instituto ta tene un rueda di prensa.

Esaki ta lokual por konkluí for di un invitashon di prensa emití pa CMC, indikando un posibilidat di presentashon di sifras, òf aló ménos interpretashon di esakinan. Kontrali na lokual tin na spekulashon, e situashon di likides penoso na CMC no tin nada di haber ku empleadonan, salario ni tampoko gerensha. Indikadónan di resultadonan finansiero a konkluí ku kostonan di interes haltu, debí nan fiansa haltu pa finalisá konstrukshon di e hospital i su transishon ta simplemente impagabel pa CMC. Kuenta Anual 2020, no ta nada bon. Si CMC su organisashon no tin kapasidat di kambio, e instituto simplemente ta bai bankarota, asina e promé kota di repago riba su fiansa  (hür)m  bati na porta.

Promé ku e kuentanan anual a finalisá, tabatin atakenan dirigí riba gerensha di CMC. E atakenan, a neglishá un rapòrt di SOAB anterior, riba e kambionan, kual rapòrt awor a bin risibi sosten den e kuentanan anual. Pa por skapa CMC di bankarota, SVB mester oumentá su pagonan mediante e presupuesto di kuido. Esei ta nifiká, oumento di prima di kada trahadó na Kòrsou. Un desishon ku na e momentonan aki niun gobièrnu no ta dispuesto na tuma.

Konsekuentemente pa por kuminsá paga e tarifanan nobo, SVB mester kobra mas tantu sèn na e sektor laboral òf tin un di dos opshon, mihó kòntròl di kosto. Den un rapòrt trahá, pa un Grupo di Trabou kual rapòrt tambe a keda neglishá, tin tur detaye kon pa manehá un mihó kòntròl riba kosto den kuido médiko na Kòrsou. De fakto, den pasado SVB a risibi un karta for di Ministerio di Salubridat, e tempu ei manehá pa eks minister Camelia Romer. Den e karta menshoná, SVB a risibi e órden pa kuminsá ehekutá kontenido di e rapòrt pa por logra kòrta kosto den kuido médiko na 80 mion florin. Despues ku minister Camelia Romer a baha, e siguiente ministernan no a atendé e problemátika.

Un di dos problema den kuido médiko ta e pagamentu di e kontribushon nashonal na SVB. Anual ta bai entre 200 pa 300 mion pa “yuda” SVB ehekutá pago den kuido médiko debí na nesesidat pa finansiamentu di likides na SVB. Pa por kompará, ta trata di 2.1 bion florin a bai pa yuda SVB kubri gastu durante último 9 aña. E peso di SVB, a afektá presupuesto nashonal di Kòrsou, lagando poko espasio atras pa finansiá kostonan den desaroyo sosial, enseñansa, formashon i infrastruktura. E finansiamentu èkstra di SVB, ta e problema makro ekonómiko mas grandi pa solushoná na Kòrsou.

Na Mei último, den un desishon intermediario  di Korte Sivil, CMC tabata por a kuminsá mira horizonte pa inisiá un proseso di oumento den su tarifanan di kuido. Un oumento den tarifa ta nifiká mas entrada pa CMC i mas likides pa kubri gastu. Entretantu, Gobièrnu di Kòrsou tin den su man un rapòrt di e Instituto Nashonal di Kuido, NZa.  Unu di e desepshonnan ku gerensha di CMC ta konfrontando ta e negligensha di e Instituto Nashonal di Kuido Na Hulanda, pa rekalkulá tarifa na CMC. Na 2021, momento a opta pa permití entrada di NZA na CMC, gerensha na CMC a pensa esaki lo ta na benefisio di e hospital nashonal. Ku e pensamentu aki, NZA ta sali fo’i punto di bista ku CMC mester sigui kobra for di e presupuesto di kuido konforme alokashon.

Pa por konkluí, e kuenta anual 2020 finalmente ta menshoná diferente punto adishonal, aparte di e kosto di kapital haltu. Sifranan menshoná riba e presupuesto di kuido tambe ta e problema. Konforme konseho di SOAB. SVB mester a kubri 75 mion florin for di 2020 kompará ku Sehos. Sehos a risibi na 2018, 155 mion florin na entrada di SVB, 135 mion for di presupuesto di kuido, 14 mion pa spesialistanan den servisio, 3 mion pa poliklínika i 3 mion adishonal pa asistentenan médiko.  E sifranan aki  ta indiká alabes ku CMC mester ta risibiendo 229 mion florin for di SVB, esta e 74 mion prekalkula via dje rapòrt di SOAB i 155 mion ku Sehos tabata risibi na 2018. CMC ta risibiendo, 202 mion florin anual lokual ta 27 mion florin ménos.