10 mion: na ougùstùs próksimo, Javier Silvania komo minister di finansas tin di kuminsá
depositá 10 mion pa paga ámtenarnan ku retiro boluntario.

Punda— Ta spekulando ku e desishon di VVU lo kosta alrededor di 50 pa 60 mion florin i lo skapa alrededor di 7 mion florin mensual na kostonan di salario pa ámtenar. 27 mion florin di e total pago na VVU ta tuma lugá durante último mitar di 2021.

Manera ta konosí, Parlamento di Kòrsou ayera durante un reunion públiko a logra pasa un moshon riba VVU, e Lei pa di Retiro Boluntario pa Ámtenar. Unu di e eksigensianan pa gobièrnu baha gastu ta kòrta den salario di ámtenar. Mediante VVU, esaki ta bira posibel, pero for di desèmber 2020 tin riba 600 ámtenar ta wardando riba e desishon. Te ku luna pasá, e bolsa di ámtenar ta kostando gobièrnu di Kòrsou kasi 24 mion florin neto i alrededor di 38 mion florin brutu dependé retrasonan den kompensashon. Te ku mart último, gobièrnu a paga 38 mion florin brutu na salario. E suma total na salario di ámtenar ta kasi 33% dje entrada total ku gobièrnu ta kobra na impuesto. Esaki, saliendo fo’i punto di bista riba kobransa di impuesto sin Covid. Esaki ta 1.5 miar florin. Pero na 2020 a kobra 1.2 miar florin miéntras pa 2021 ta teme ku e suma lo ta mas abou ku esaki i por yega 1 miar florin. E sifranan aki ta trese e kosto di salario públiko na 42% di lokual gobièrnu kobra na impuesto.

Parlamento a bai di akuerdo ku e moshon pa (servisio di BPD) keda informá parlamento kada 6 luna riba e desaroyonan dje Lei riba VVU. Ku e aprobashon aki, gobièrnu di Kòrsou por mustra Hulanda e boluntat pa sigui riba e ruta di efisiensia den aparato públiko. Pa ougùstùs próksimo e promé 10 mion na pago di retiro boluntario ta tuma lugá. E tareanan ta inisiá despues di mas ku 1 aña ku Hulanda a stipulá nan kondishon pa sigui duna Kòrsou sosten finansiero.