Back to Top
Vigilante banner image

3 di e 189 personanan hospitalisá tabata kompletamente bakuná


October 7, 2021 • 2 minüt pa lesa

Resúmen semanal di hospitalisashon publiká pa Gobièrnu di Kòrsou

PUNDA- Análisis semanal di datos lokal riba infekshon ku Covid-19 ta keda enfatisá efektividat di bakunashon pa loke ta protekshon kontra hospitalisashon i morto kousá pa Covid-19.

Segun último publikashon di Gobièrnu di Kòrsou, entre 22 di yüli te ku 5 di òktober 2021 un total di 189 persona a keda hospitalisá pa motibu di Covid-19.

Di e 189 personanan aki, 177 persona no tabata bakuná, 4 persona tabatin solamente 1 bakuna, 1 persona a haña Covid-19 den ménos ku dos siman despues di su di dos bakuna, 4 persona tabata kompletamente bakuná pero ku un sistema inmunológiko perhudiká i 3 persona tabata kompletamente bakuná.

Kalkulashon den porsentahe basá riba e sifranan menshoná ariba ta mustra ku 3.7% di e hospitalisashonnan for di 22 di yüli ta personanan bakuná, di kual 1.9% ta personanan ku tabatin protekshon total di tur dos bakuna. Esaki ta nifiká ku 98.4% di personanan hospitalisá no tabata protehá, di kual 93.7% no a risibí ningun bakuna.

Di e 7 personanan kompletamente bakuná ku a keda hospitalisá, 4 di e personanan aki su sistema inmunológiko ta perhudiká. Manera investigashon sientífiko a konstatá, personanan ku un sistema inmunológiko perhudiká no ta benefisiá kompletamente di e protekshon ku e bakuna kontra Covid-19 ta duna. Pa e motibu aki ekspertonan médiko ta di opinion ku e grupo vulnerabel aki lo benefisiá di un èkstra shòt di bakuna komo refuerso pa nan sistema inmunológiko.

E sifranan lokal pa loke ta efektividat di bakunashon kontra malesa severo, hospitalisashon i morto kousá pa Covid-19 ta similar na resultadonan internashonal.

Aktualmente Kòrsou ta konta alrededor di 98.280 persona bakuná di kual algu mas ku 89.000 persona a risibí ambos shòt di bakuna. Segun publikashon di RIVM, esaki ta resultá den un porsentahe di 60% di e poblashon lokal ku a risibí por lo ménos un shòt di bakuna i 55% kompletamente bakuná.

Login