WILLEMSTAD,—-Djarason awor ku ta 30 di desèmber pa 9 or di anochi. Korant Vigilante tin un bunita gesto pa tur su siguidónan, riba su plataforma di Vigilante Online. Riba e dia en kuestion, lo bai tin “Fiesta na kas”, pa bailadores.

T’asina ku djarason awor, lo bai tin un tremendo show di diferente kantante popular den ámbito di Kòmbèk, ku lo bai presentá. E kantante nan ta Kenneth Hooi di agrupashon musikal Zudup Hopi Forsa, Shu Aniceta di Sabor “S.O.”Original, Lady Su, Monica Mao-Cheia, Vientle Villareal ku ta forma parti di agrupashon musikal Reinan di kaya, Boy Thode ku no tin mester di ningun sorto di introdukshon i Aisly “Ash” Rooi di Classic XD, ku sigur por mira atras riba un aña eksitoso ku su piesa “One Love For Life”.

Esaki ta e kantantenan ku lo bai presentá den e show di djarason awor, riba e plataforma di Vigilante Online. Pa wak e show menshoná ta masha fásil, simplemente bo mester kumpra un karchi na kualke un toko i òf minimarket, ku ta bende Korant Vigilante, pa solamente 9 florin, ku e mes un karchi en kuestion, bo ta risibí tur notisia riba e dia en kuestion den Korant Vigilante.

Ta bon pa bisa aserka tambe, ku den e forma aki, kada un di nos ta sostené nos mes un artistanan lokal. Esaki sin duda ta e normal nobo ku nos artistanan lo bai usa por lo pronto den mundu di farándula. Pues e sistema di Virtual, kaminda ku bo ta sinta na bo kas, òf unda ku bo ta, riba bo telefon, pa un suma di solamente 9 florin, bo ta haña un tremendo show mira riba e plataforma di Vigilante Online. Esaki ta bai bira e promé show riba e plataforma menshoná, kaminda ku bailadoresnan ta bai disfrutá di nos mes un artista nan ku ta Ash Rooi, Kenneth Hooi, Lady Su, Shu Aniceta, Monica Mao-Cheia i Boy Thode. Esaki sigur ta e forma i manera pa kada fanátiko sostené nan mes un artista nan yu di Kòrsou. Kòrda ku e show ta kuminsá 9 or di anochi en punto. I no lubidá ku esaki ta kosta solamente 9 florin i bo ta sinta i disfrutá di 7 artista ku tin masha hopi hit riba nan nòmber i tambe lo bai tin algun piesa nobo ku ta bai keda presentá. Vigilante Online ta invitado pa bo wak e tremendo show, “Fiesta na kas” pa Bailadores, djarason awor 30 di desèmber pa 9 or di anochi. Karchinan di abono ta optenibel na diferente toko i minimarket den bo bario.