E hòmber a keda kondená pa ladronisia di baiskel.

Rijswijk,– Un hòmber nasé na Kòrsou(40 aña) ta wòrdu kondená na un kastigu di 30 dia den prizòn relashoná ku ladronisia di un baiskel riba 7 di òktober 2022.

Segun informashon riba e fecha ariba menshoná pareha di e víktima lo a buta e baiskel eléktriko karga riba stupi banda di e kurá dje kas. Un bisiña lo a wak e hòmber bistí na pretu i kòrá nota di e baiskel den e área. Dado momentu e akusado lo a para mei mei di su baiskel i baiskel dje víktima. I dado momentu e hòmber lo a bai ku e baiskel. Tabata notabel ku na e momentu ei, e hòmber tabata kore ku dos baiskel. Algun ratu despues, mitar di 12 di anochi, outoridatnan a nota di un hòmber tabata kore den oranan di anochi ku dos baiskel. Na momentu ku a ordená e persona aki para a bin diskubrí ku e akusado tabata kore ku un baiskel huntu ku su kargadó. Kual tabata un situashon sospechoso.

2 dia despues, esta riba 9 di òktober 2022, polisnan na Rijswijk ta risibí un denunsia di e víktima. Segun e víktima, den oranan di atardi riba 7 di òktober su pareha a bai karga e baiskel, kaminda e siguiente, riba 8 di òktober, e no por a haña e baiskel mas. Tambe a resultá ku polisnan a interseptá e hòmber den e mesun área, pues tabata tin tur indikashon ku e hòmber a purba na hòrta e baiskel. Dilanti hues komisario e akusado a splika ku ta un baiskel ku el a kumpra. Pero korte penal no por a bai tras di e deklarashon nan aki mirando ku e hòmber lo a duna diferente preis ku el a paga pa e baiskel.

Ta asina ku korte a kondená e hòmber na un kastigu di 30 dia, kaminda 16 dia ta keda kologá riba forma kondishonal pa 2 aña. Durante e temporada di prueba e akusado mester mèldu na reclassering pa tratamentu adishonal. Mas aleu, e akusado mester hasi tèst di alkohòl i droga pa asina evitá pa e akusado kai bèk riba e ruta robes.

Den su totalidat e akusado nasé na Kòrsou tabata tin 4 akusashon, pero dos akusashon a bin kai na awa. E otro akusashon kual e hòmber si a keda kondená tabata pa falta agentenan polisial rèspèt na momentu ku el a keda interseptá ku e baiskelnan.