Back to Top
Vigilante banner image

30 ora di trabou pa hòmber ku tabata menasa dama asiátiko


May 29, 2021 • 3 minüt pa lesa

E akusado tabatin abogado mr. V.S.La Fleur pa hiba su defensa.

Nieuwe Haven–  Wes a kondena e hòmber R.H kende ta wòrdu akusá di a menasa mama di su yu di kual ta un dama asiátiko na 30 ora di trabou. E akusado tabatin abogado mr. V.S.La Fleur pa hiba su defensa.

Ta asina ku ta akusá e hòmber aki ku den e periodo di 7 di Desèmber di aña 2020 te ku 25 di Febrüari di e aña aki na vários okashon lo a menasa e mama di su yu kende ta un dama asiátiko. Aparte di ku e tabata menasa e dama a insult’é i a usa palabra nan inkoativo den su direkshon, tambe na vários okashon e la menasa e dama ku e lo bai mat’é. Ta trata aki di un kaso di problema entre pareha unda ku e akusado ta bebe i despues ke bai wak su yu, pero debí ku e ta bou di influensia di alkohòl e ta kuminsá molestiá mama di e yu i tin biaha asta a hasi destrukshon na e dama su vehíkulo.

Segun e akusado ku e kosnan no a bai manera ta interpretá nan i ku asta un biaha e tabatin 20 mil florin e la indiká ku e la duna e dama pa e por a stòrt esaki riba kuenta pe paso e no tin kuenta di banko i e dama a gasta esaki. E la splika ku mayoria biaha tabatin problema entre e ku e dama enbèrdat pero ku sierto di e kosnan ku e dama a deklará no ta kuadra. Wes mr. Snitker a duna e dama víktima tambe e oportunidat di por a duna su deklarashon den sala. Segun e dama na momentu ku e akusado  bebe e ta bira un kos ku no ta sirbi e ta bira mònster.

Tambe e la splika ku lokual ku e akusado ta papia di dje tokante di e 20 mil florin e mes a manda stòrt e sèn pe, pero despues e mes ta bai i gast’é na Kasino òf ku e ta kumpra alkohòl i kaba tur e sèn. E dama a splika wes ku ora e bisa nan yu pa yama su tata kende ta e akusado R.H, e yu ta bisa ku e no ke hasi esaki i ku e tin miedu pa tata no mat’é. Ta p’esei e dama ta pidi pa e hòmber keda leu for di nan i pa evitá mas problema. E dama a splika ku si e hòmber lo ke wak e yu, e lo no bai kontra di esaki pero e hòmber no mester ta fuma sino.

Segun fiskal mr. Niks ta trata aki di un kaso di problema entre pareha pero aparte di esei ta trata aki tambe di un kaso unda ku alkohòl tin efekto grandi riba e akusado. Segun fiskal pa loke ta trata e parti di problema den pareha pa por wak yu esei no ta algu ku ta den su man, pero si e por elaborá riba e parti di menasa.

Fiskal a hasi un demanda di 30 ora di trabou di kual si e no kumpli òf hasié bon mester wòrdu enkarselá pa 15 dia, tempu di prueba di 3 aña i tambe 2 siman enkarselá pero kompletamente kondishonal.  Wes a indiká na e akusado ku e no ta e wes apropiá pa disidí kiko lo sosodé ku e yu i ku e lo no por bai tuma un desishon pa ku e situashon ei. Wes a bai di akuerdo ku e demanda di Fiskal i tambe e la bisa ku e la ku tantu e akusado komo e dama asiátiko lo bai tin mester di guia kon pa dil ku e situashon pa e yu. Tambe e hòmber lo mester bai risibí guia i training na FMA pa por dil ku su problema ku alkohòl.



Login