Mas ku 90% di poblashon di tribon lo wòrdu protehá.
Willemstad,– Siman pasá djabièrnè e konferensha internashonal di bienestar di bestia a finalisá kaminda 500 bestia nobo a subi riba lista di protekshon. Den e lista aki 50 diferente rasa di tribon a wòrdu inkluí.
E konferensha tené na Panama, CITES, a finalisá ku delegadonan a bai di akuerdo pa inkluí mas ku 500 diferente rasa di bestia riba lista di protekshon. E lista aki su meta ta pa protehá poblashon di bestia ku ta biba den medioambiente i naturalesa. E organisashon ta kombatí prinsipalmente importashon i eksportashon di artefaktonan ilegal di bestia. Artefaktonan manera kachu kabritu eksótiko i turtuga eksótiko.
No ta un sekreto ku último añanan poblashon di tribon a redusí riba un forma drástiko. E rason pa e redukshon drástiko ta relatá na piskamentu di tribon ku meta pa traha sòpi di ven di tribon. E merkado di ven di trabon ta generá alrededor di 600 mion dòler tur aña pa paisnan asiátiko manera China, Hapon i Taiwan.
Mirando ku awor diferente rasa di tribon ta subi e lista di protekshon, e lista aki lo por defendé e poblashon di tribon riba un forma muchu mas efektivo. Segun diferente eksperto e desishon pa inkluí 50 rasa di tribon ta algu históriko. E desishon aki lo por proetehá mas ku 90% di e poblashon aktual di tribon.