CMC mensualmente ta publiká sifranan di nan prestashon.

Otrobanda,– Ketubai e kultura di akudí na sala di emergensia na CMC sin referensia di bo dòkter di kas òf HAP ta bisto. Atrobe pa 12 luna siguí CMC ta publiká ku mayoria pashènt ku yega na porta di sala di emergensia, ta yega sin ningun referensia di un médiko.

Den práktika mester separá kasonan di emergensia i kasonan di urgensia. Kasonan di emergensia ta kasonan kaminda e bida di e pashènt ta na peliger, por ehèmpel problema pa hala rosea òf un aksidente grave. Kasonan di urgensia ta inkluí kasonan kaminda e pashènt meresé atenshon di kuido, pero na mesun momentu e situashon no ta un peliger pa bida di un pashènt. Kasonan di urgensia ta inkluí un keintura ku ta riba riba 40 grado òf doló di kabes sumamente grave ku no ta kita. Kasonan di emergensia por akudí mesora na sala di emergensia pero kasonan di urgensia por wòrdu tratá solamente dor di referensia di un dòkter di kas òf via referensia di HAP.

Segun sifranan publiká dor di CMC, 1144 persona a yega na Sala di Emergensia sin referensia di un médiko. E kantidat aki ta suma 59% di tur bishita na sala di emergensia. E publikashon di CMC ta suma tambe ku 1932 pashènt a yega den luna di desèmber na Sala di Emergensia. Pero ketubai ta notabel ku 60% di e kasonan tratá a bai kas bèk i solamente 577 kaso a finalisá ku hospitalisashon di e pashènt. 186 pashènt a keda katogorisá komo otro, kual por inkluí pashèntnan ku a bai un otro sentro médiko òf a keda transladá pa eksterior.

Un otro trènt positivo den e sifranan ta ku e bishitanan na Sala di Emergensia den su totalidat a baha ku 8.6% na 2024 si kompará esaki ku 2023. Na 2023 Sala di Emergensia a risibí 21.370 pero na 2024 esaki a bin baha te ku 19.529.