Punda– Benta di Banco di Caribe, no ta solushoná problema di Ennia Caribe Holding. Esaki ta lokual por konkluí for di sumanan menshoná den Korte di Hustisia, durante diferente tratamentunan for di Yüli 2018.

Na promé lugá na Yanuari 2021, dilanti wes Nootenboom prome ku a inisá e proseso a fondo, kual lo wòrdu tratá na Òktober prókismo, a papia di 850 mion florin ku mester rekuperá.  Abogadonan di Banko Sentral, Sabine Altena a konfirmá ku ta trata di un defisit den kobertura okashoná pa desishonnan den Ennia Caribe Holding promé ku Yúli 2018. Den e komunikado di Banko Sentral, no a menshoná e suma negoshá pa benta di Banco di Caribe. 

Rumornan sirkulando den komunidat Bankario a menshoná un suma di 60 mion florin i na Yüni 2021, Vigilante a komuniká ku Banko Sentral riba e pregunta pero nunka mas Hunta di Maneho no a duna un kontesta riba esaki. Banco di Caribe ta e “baka lechera” “cash cow” di e grupo Ennia Caribe Holding. Benta di e aktivo aki no tin sentido den promé instante mièntras e no ta drecha e problema di solvabilidat den e totalidat.

Banko Sentral ta papiando di 850 mion florin pa rekuperá i benta di BdC no ta surpasá 70 mion florin. Ainda ta keda un problema di 780 mion di kobertura i e problema di solvabilidat no ta solushuná. Ademas, Banko Sentral nunka den korte no a spesifiká e problema di solvabilidat tampoko. 

Kuidou: mester tene debido kuidou pa Banko Sentral, no bolbe okashoná un problema, e biaha aki mas grandi ku Giro. Giro a resultá den un debakle di 170 mion florin i ta via di fiansa na Hulanda mester a paga tenedónan di kuenta. E 170 mion a krea mas debe pa Kòrsou. Banko Sentral a tene Giro kasi 6 aña bou di kuratela i maneho emergente sin a solushoná e problema. Na Ennia e daño por bira mas grandi. Sigur si Banko Sentral kuminsa kai den pániko. 

Na Yüli 2021, segun José Jardim e  sakeo total na Ennia Caribe ta 1.2 miar florin miéntras esfuersonan di Banko Sentral a logra rekuperá 500 mion. Ainda ta keda 700 mion florin ku otro den kortenan sivil na Kòrsou, lo trata na rekuperá.

Pa por a logra rekobrá 500 mion un suma di kasi 9 mion florin a bai na esfuersonan inkluso kostonan di abogadonan internashonal.  Esaki ta lokual Jose Jardim a duna di konosé ayera durante un rueda di prensa na edifisio di CBCS na Skalo.  Ennia tin por lo ménos 40 mil kliente den nan bolsa di asegurado repartí riba 100 mil polisa inkluso riba otro islanan den parti di Reino Hulandes. Entre yüni 2017 pa novèmber 2017, Parman International di Hushang Ansary a logra, den traspasonan internashonal transformá aktivonan den grupo di Ennia Caribe (6 kompania) den akshon riba bolsa di balor na Estádos Unidos. Entre dos kompania kual e la logra traspasá aktivo ta Kirby International i Nabor Industries. Tambe riba kuentanan di e kas di invershon estado unidense, Merrill Lynch tabatin kasi 500 mion florin, kual a logra rekuperá.

Segun Jose Jardim e kostonan pa supervishon pa Medida di Emergensha ta haltu pero nan ta bou di supervishon di un wes komisario. Korte sivil a apuntá un bolsa di 15 mion florin pa finansiá Ennia su medida di emergensha,entretantu segun por e komprondé ayera un suma di 9 mion a bai. 13 di sèptèmber 2017 Hushang Ansary a raportá un tomo pasivo di 8.8% den Kirby Corporation. Kirby ta balorá na 4.2 bion dòler riba merkado di bolsa. I riba 6 di novèmber 2017 Reuters ta anunsiá  ku Ansary, un biaha mas ta raportá un tomo pasivo di 6.7% den Nabors Industries. Nabors ta balorá na 2.2 bion dòler. Ta trata di dos invershon sólido. 

Na e momentonan aki den korte tin interkambio di dokumentashon entre abogadonan di Ennia banko Sentral i esnan di Parman International di Ansary, preparando pa e kaso a fondo den kortenan na Kòrsou. Ennia ta bai claim 700 mion na grupo Parman i tambe eks direktornan na Kòrsou huntu ku yu muhé di Hushang Ansary, Nina Ansary. Ta sospechá ku durante e traspasonan di aktivonan den Kirby i Nabors, a uza sèn di grupo Ennia. Segun Grupo Ansary bou di na maneho, Ennia nunka no tabata den problema.