Tasa di kontagio ta mas haltu serka di personanan bou di 40 aña di kual mayoria ta hende muhé

PUNDA- Segun análisis konduktá pa tim di epidemiologia lokal, infekshon ku Covid-19 ta mas haltu bou di e grupo no bakuná òf no kompletamente bakuná. Ademas, gran mayoria di personanan hospitalisá na CMC no ta bakuná.

Análisis di e average pa siman di kontagio ta mustra ku for di komienso di e brote aktual na yüli e tasa di kontagio na mas haltu serka personanan bou di 40 aña. Ademas, por mira riba e gráfiko ilustrativo publiká pa Dr. Izzy Gerstenbluth ku mas hende muhé ta keda kontagiá kompará ku hende hòmber.

Si kompará e personanan ku tabata keda infektá na komienso di e brote aktual, por a mira ku esaki tabata prinsipalmente hóbennan te ku 25 aña. Análisis konduktá di último simannan a mustra ku mas ku anterior awor muchanan entre 0-12 aña tambe ta keda infektá ku e vírus di Covid-19. E gran mayoria ta keda e grupo entre 25 pa 60 aña, di kual e grupo entre 40 pa 64 aña ta esnan ku mas ta keda hospitalisá.

Si wak semanalmente e kasonan di infekshon, por mira ku gran mayoria ta personanan no bakuná. Análisis konduktá ta mustra ku alrededor di 25% di e kasonan di infekshon ku e variante Delta ta bou di personanan bakuná. Manera ya ta konosí, bakunashon no ta duna 100% protekshon kontra infekshon ni hospitalisashon. Sinembargo, bakunashon a prueba di ta protehá gran mayoria di poblashon kontra infekshon, hospitalisashon i morto kousá pa Covid-19. Ademas sifranan lokal ta mustra ku 97% di personanan hospitalisá no ta bakuná òf no ta kompletamente bakuná.

Ademas, Dr. Gerstenbluth a duna di konosé durante relato di dia ku entrante 30 di ougùstùs 2021 lo kanselá e “bubble” entre islanan di reino Hulandes debí na oumento drástiko di kasonan na Aruba i Sint Maarten.