Back to Top
Vigilante banner image

9000 persona no a tuma e di dos shòt di bakuna


July 24, 2021 • 3 minüt pa lesa
Kantidat di kaso positivo pa SARS-CoV-2 raportá diariamente na Kòrsou, segun fecha di registro di RIVM

PUNDA- Segun análisis publiká pa RIVM, kasi 9.000 persona na Kòrsou no a tuma un di dos shòt di bakuna. Un shòt di bakuna ta duna 30% protekshon kontra e variante Delta. Esaki no ta sufisiente protekshon kompará ku e 80-88% ku dos shòt di bakuna ta ofresé.

Te ainda ningun variante no a logra evadí bakuna kompletamente. Algun variante di e vírus di Covid-19 ta mas transmisibel i parsialmente algun por evadí antikuerponan kreá pa e bakuna. Esaki ta motibu di e redukshon den efektividat, ku anteriormente tabata mas ku 90%, serka e variante Delta. E bakunanan aktualmente aprobá pa usa kontra Covid-19 ta mustra di ta efektivo kontra variantenan, inkluí e variante Delta ku ta kousando oumento di kasonan nobo rònt mundu

Aktualmente algu mas ku 91.000 persona na Kòrsou a risibí un shòt of mas di bakuná. Un total di 81.134 a risibí ámbos shòt. Pa loke ta trata personanan kompletamente bakuna e sifra ta un tiki mas haltu, alrededor di 82.000, debí na e echo ku personanan ku tabata infektá ku Covid-19 tin nesesidat di un solo shòt pa ta kompletamente bakuná. Análisis di kasonan di infekshon ku Covid-19 e siman aki ta mustra un oumento di kasi 3 bia mas tantu infekshon kompará ku siman pasá. Segun sifranan publiká pa RIVM den e siman di 15 pa 21 di yüli, 310 persona pa kada 100.000 habitante a risibí un resultado positivo pa loke ta trata infekshon ku Covid-19. E siman anterior, te ku 15 di yüli, e kantidat di kasonan positivo tabata 105 pa kada 100.000 habitante.

promedio di infekshon registrá pa kada 100.000 habitante na Kòrsou, Aruba, St Maarten i Boneiru

Manera ya ta konosí último simannan Kòrsou ta eksperensiando un oumento drástiko den kasonan di infekshon ku Covid-19, probablemente kousá pa e variante Delta. E oumento aktual ta relashoná ku algun klùster di infekshon ku a keda registrá den entre otro farandulá, klup di playa, kas di studiante i tambe na base di marina.

Segun informashon di datos sientífiko e variante Delta ta muchu mas kontagioso ku e variantenan anterior, ademas por mira un kambio den edat di personanan ku ta keda afektá pa e variante aki. Pa loke ta trata e kasonan di infekshon di e último dos simannan, kasi 50% ta entre personanan di 19 pa 24 aña. Pues a base di e informashon aki por mira, meskos ku a keda pruebá na otro paisnan, ku aktualmente personanan mas hóben ta esnan ku ta keda kontagiá ku e vírus di Covid-19. Sinembargo, mayoria di e kasonan di infekshon aktual ta bou di personanan no bakuná i esnan no kompletamente bakuná.

Hospitalisashon komo konsekuensia di infekshon ku Covid-19 aun ta abou, aktualmente Kòrsou tin 2 persona hospitalisá. Si kompará datos internashonal por mira ku diferente otro pais ku tambe tin un tasa di bakunashon relativamente haltu no a registrá oumento den hospitalisashon kousá pa e variante Delta den komienso. Sinembargo, despues di algun siman sin oumento signifikante den hospitalisashon, aktualmente Inglatera ta eksperensiando esaki. Ta importante pa prepará paso tin chèns ku e variante Delta por kousa un brote severo lokal, mirando ku ainda tin kasi mitar di nos poblashon ku no a bakuná.

Saba a yega inmunidat kolektivo

Manera ya ta konosí pa algun luna kaba, sientífiko i ekspertonan médiko rònt mundu ta di opinion ku un tasa di bakunashon di 75% òf mas den un poblashon lo por duna protekshon sufisiente pa protehá kontra e vírus di Covid-19. E meta di trayektonan di bakunashon rònt mundu ta pa yega un mínimo di 75% pa asina por kuminsá papia di inmunidat kolektivo den poblashon i ku speransa ku por yega esaki mundialmente tambe un dia.

Diferente pais, inkluyendo Kòrsou, a logra di surpasá 50% di personanan kompletámente bakuná. Pero tiki pais ta esnan ku a realmente logra yega e 75%.

Análisis di islanan den reino publiká pa RIVM, ta mustra ku Saba a logra pa bakuná 75% di nan poblashon kompletamente. Sientífikamente, Saba por kuminsá papia di inmunidat kolektivo den nan poblashon. Pa loke ta trata infekshon ku Covid-19 na Saba, for di 11 di mei 2021 ningun kaso positivo no a keda registrá.

Tasa di bakunashon di islanan den reino Hulandes. Por mira ku Saba a logra yega un tasa di 75% di nan poblashon bakuná

Login