Willemstad,– Marlon Regales ku ta forma parti di “Plataforma Sklabitut i Herensia di Sklabitut” i un aktivista pa empoderá e pueblo di Kòrsou ta kondena ku ta falsifiká historia di nos héroe nashonal Tula, asina señor Regales a bisa na Vigilante.

Segun señor Regales un di e lidernan prominente di e partido polítiko “KUMUN” ku ta boga pa Kòrsou bira munisipio di Hulanda ta engañá e pueblo di Kòrsou ku nos héroe nashonal Tula no a bringa pa libertat si no pa igualdat i segun señor Regales, e persona aki a keda ripití esaki ku hopi fervor , kual a pone ku asta hopi hende ku sa mihó mes a kuminsá duda.

“Echo ta , ku den e rapòrt di Pater Kacobus Schinck , e la skibi ku Tula a bisa , nos ta lucha pa nos libertat”, asina Regales ta bisa.

E ta sigui bisa ku e revolushon a wòrdu inspirá for di esun di Haiti ku a bin for di esun franses ku ta bisa Libertat , liberté , égalité , fraternité.

“Bo mester haña bo libertat promé pa bo por negoshá igualdat pa bo bin kulminá den faternidat, Ku esaki mi ta spera di drecha e daño ku un lider prominente di partido KUMUN a hasi na nos historia”, asina señor Regales a terminá bisando.