Presidente kolombiano Ivan Duque, den oranan di djaluna último na Cali.

BOGOTA – Sindikatonan i organisashonnan sosial di Colombia a yama pa mas protesta, despues ku e Komité Nashonal di Paro i e presidente kolombiano Ivan Duque, no a logra yega na un akuerdo den e reunion selebrá den oranan di djaluna. Esaki despues di 13 dia konsekutivo di mobilisashon nan sosial.

E protestanan, ménos intenso ku den dianan anterior a persistí na e pais, ta yama na diálogo i den oranan di djadumingu tenshon a subi na e siudat di Cali, pa konfrontashonnan di supuesto sivilnan armá kontra marcha indígena.
Segun a keda indiká, e gobièrnu den ámbos temanan sentral ku a bini dilanti, no a sa di bisa nada konkreto.
Sindikalistanan, organisashonnan sosial, maestronan, entre otro, ta esnan ku ta agrupá bou di e Komité Nashonal di Paro i ta kende nan a konvoká un wèlga nashonal pa awe, djárason. Esaki lo bira e terser paro entre e situashon bibá na e pais.

Na e reunion, realisá na Casa de Nariño, sede di e Ehekutivo, e visepresidente di Repúblika, Marta Lucia Ramirez, komishonado pa pas, Miguel Ceballos i tambe e representantenan di Komité di Paro, a sa di ta presente.
Ademas, e representante di Colombia pa ONU, Carlos Ruiz, i e representante di Iglesia Katóliko tambe tabata presente komo intermediadó.

Loke hóbennan ta pidi
Aunke ku Duque a retirá e reforma fiskal, e motibu prinsipal di e protestanan, e mobilisashon nan di hóbennan ta sentrá nan petishonnan pa gobièrnu uza e mekanismo pa ofresé nan oportunidat di trabou berdadero, edukashon, pa pone fin na brutalidat polisial i pa retirá di Kongreso un intento di reformá salú, entre hopi otro demandanan mas.

E presidente, despues di diferente yamada pa akudí na Cali, episentro di e protestanan, a hasi den oranan di anochi un bishita di kuater ora pa asina reuní ku outoridatnan lokal, aunke no a reuní ku ningun protestante òf bishitá barionan mas afektá pa e protestanan.

Aki e kabesante di estado a pidi un biaha mas pa kita e blokeo ku protestanan a pone na salida i entrada di e siudat i di otro lokalidatnan na e pais. Ademas a pidi pa indígena nan di sùitost di e pais regresá bèk nan sitio pa evitá konfrontashonnan. E bishita a keda produsí despues di 12 dia di protesta, ku disturbionan serio, episodionan di sakeo i esenanan di violensia brutal di parti polis. Esaki ademas despues ku vários supuesto sivilnan armá a kuminsá lòs bala kontra un marcha indígena. Esaki a laga saldo di ocho persona heridá.

Koinsidensia i diferensia ku e Komité di Paro
For di inisio di e protestanan dia 28 di aprel na Colombia, un total di 27 persona a pèrdè nan bida. Di esaki nan 11 ta ligá direktamente ku echonan, 7 ta den verifikashon i tin 9 ku no ta relashoná ku e protestanan.

Sinembargo, ONG Temblores i e Instituto di Estudionan pa Paz, a dokumentá 47 víktima mortal, 1.976 kaso di uso abusivo di forsa, 28 víktima di agreshon okular, 278 herido i 963 detenshon arbitrario kontra manifestantenan. Esaki ademas di un total di 12 kaso di violensia seksual. E rechaso na violensia ta e punto unda e gobièrnu i e Komité ta di akuerdo. Ámbos a rechasá e situashon, sinembargo den otro asuntunan tin diferensianan profundo.

E presidente di Central Unitario di Trahadónan, Francisco Maltés, a afirmá periodistanan despues di e reunion ku no tabatin empatia di gobièrnu ku e kousanan di e protesta ni tampoko ku víktimanan di violensia kontra manifestantenan. E komishonado di pas, Miguel Ceballos, a sigurá di su banda ku tin koinsidensia i rechaso na violensia i den 0 toleransia pa kualke komportashon di forsa públiko ku ta bai kontra lei, pero tambe a kondená tur violensia na derechi ku kualke siudadano tin. Mas aleu a indiká ku ta konsiderá ku e reunion aki tabata eksploratorio pero ku di tur forma mester krea espasio pa diálogo ku mediashon di ONU i iglesia.

Preokupashon internashonal
E komunidat internashonal a bolbe ekspresá nan preokupashon pa e krísis ku Colombia ta pasando aden i diferente organismonan i gobièrnunan a hasi un yamada pa adoptá medidanan kontra uso eksesivo di forsa di parti polis.

Den e sentido aki a ekspresá Amnistia Internacional ku a pidi pa pone fin na violensia kontra indígena nan ku ta manifestando na Colombia. Esaki señalando ku e atakenan di sivilnan armá, algun den presensia polisial, ta un refleho di e dinámika di violensia ku no ta para na Colombia. E koinsidensia, e ofisina na Colombia di e komisionado di ONU pa derechinan humano, a manifestá nan rechaso pa e atakenan sufrí na e grupo di indígena na Cali i a ekspresá un preokupashon grave.