MARCHENA—Ayera mainta lat, e Kordon Fúnebre kompañando eks promé minister i lider di MAN, Don Martina a para un ratu pa duna onor pa su último bishita na Lanthùis Morgenster.

Morgenster pa hopi aña a sirbi komo sede di e tolda blou unda Don Martina tabata lider. E bishita di e kordon tabata kompaña pa un karavana di polis huntu ku dos bus transportando miembronan di famia, konosí i amigunan.

Tabata momentonan bastante emoshonante na Marchena, momento e kordon a yega e Lanthùis ku a sirbi komo sentro di kordinashon pa e blounan. Reportero polítiko pa e vespertino NOBO, Erwin Raphaela a tambe tabata presente. E la bisa ku Don Martina tabata un lider ku a sirbi komo ehèmpel, pa prinsipalmente e hóbennan. Segun Raphaela, awor ku Martina a bai su último sitio di sosiegu ta bon pa nos realisá na kuminsá hasi nos máksimo esfuerso pa tur dia nos ta mihó.

Jean Fransisca tambe a duna un reakshon ayera na Vigilante. Fransisca a traha duru pa MAN den region di Banda Abou. Segun Fransisca ayera tabata un dia tristu unda nan a bai dera na lider Dominico Don Martina. Fransisca huntu ku Martina tabata unu di e promé manistanan na 1971. Fransisca a splika ku MAN tabata hel promé, temporada nan a djòin ku Frente Obrero i despues a bira MAN blou. Segun Fransisca, Don tabata hopi stimá’;a na Banda Abou.

Elfried Koots, eks presidente di MAN pa dos aña a bisa ku ayera tabata un dia tristu, pasobra Kòrsou a pèrdè un lider inspirádo di pueblo. Segun Koots, Don a dun’é bon konseho kon pa guia e partido. Hóben polítiko, pero ku hopi eksperensia, Yael Plet, tambe a bisa ku den nan seno tabata un dia tristu di pèrdè un gran lider manera Don. Martina semper a para pa hustisia sosial i demokrasia bibu den pueblo, segun Plet. Pa MAN tabata un dia hopi duru pa nan mester a yama ayó i tuma despedida di Martina.