Nieuwe Haven— Eric Garcia ayera finalmente a drenta Korte di Apelashon despues di ta sintando un kastigu di 4 aña di prizòn den su kas. Ta trata di e kaso unda Garcia, kende tabata eks direktor di Banko Giro i kurator den algun banko internashonal, a uza fondonan sin outorisashon pa privilegiá un sirkulo di konosí invershonista.

Ayera abogado general Janssen, kende alabes tabata fiskal pa ministerio públiko durante tratamentu den promé instansha a demanda pa Eric Garcia bai bek prizon i sinta su kastigu di sinku, igual su demanda den Promé Instansha. E problema mas grandi den kaso aki aki ta e estado di salú di Garcia. Garcia ta luchando ku problema kardiológiko unda spesialistanan ta rekomendá pa atendé e situashon ku koutela. Esaki ta nifiká ku Garcia mester di atenshon médiko agudo na momento e konfrontá problema. Segun defensa di Garcia, mr. Kid Martina, Sentro di Detenshon i di Korekshon na Koraal Specht no tin e fasilidatnan ei.

Sigur no sostenibel pa un periodo di 5 aña ku Janssen lo ke mira Garcia será. Janssen a ayera den korte a splika e tribunal di 3 wes ku Garcia mester sinta su kastigu tras di trali i no den su sala di kas. Garcia su problema a inisiá via di dos amigu. David Hu i Martin Silver, ta dos estadounidense kende Garcia a konosé for di tempu e tabata laborá na Estádos Unídos, e dos hòmbernan aki a tuma sèn serka Garcia sin nunka a paga bèk. E tres hòmbernan nan amistat tabata asina bon, ku hasta nan tabata kompader di otro. Hu i Silver, a sigui traha na New York unda nan a establesé e kompania Trade Opportunity Fund kual tabata wòrdu manehá pa International Investment Group.

Eric Gracia a keda nombrá komo kurator den likidashon di, Banco Maracaibo NV, Banco Latino NV, Banco Consolidado NV i Banco Principal NV. Mediante e likidashon, Garcia tabata manehá i atministrá fondo nan mionario den likidashon. Trade Opportunities Fund a kumpra un banko na Malta, unda a súplika asistensha di e fondonan di e bankonan bou di maneho di kurator serka Garcia.

Ku tempu, e kompanianan di Hu i Silver a krese te na un kapital propio di 6 Bion dòler i komo Garcia tabata den Girobank, nan a proponé pa kumpra akshon minoritario den Giro, na 80 mion dòler.Hu i Silver, komo amigu for di 1987, a mustra Garcia ku supuestamente nan tin e 80 mion dòler, pero nan statutonan ta mustra ku nan por saka solamente 40 mion dòler komo kapital propio fo’i Trade Opportunities Fund NV, pa por kumpra Giro. E dos amigunan a sugerí na Garcia pa fia nan e demas 40 mion dòler, kisas for di e fondonan di likidashon. Garcia a saka 12 mion dòler fo’i fondo di likidashon Banco Maracaibo i 11 mion dòler for di demas bankonan bou di su bolsa di maneho. Asina Hu i Silver a yega na 23 mion dòler. Nan a logra akapará 17 mion dòler mas i kumpra 80 mion dòler den akshon na Giro Bank. Pero awor Trade Opportunity Fund mester a manda bek 23 mion dòler ku Garcia a saka for di e fondo nan di likidashon ku e tabata manehá. E sèn nunka mas no a bini bèk.

I Garcia a wòrdu pèrsigui i kondená na 4 aña. Ayera a trata su apelashon, pero Abogado General hasi mesun petishon ku den promé instansha, esta 5 aña.