Abogado mr. A. Sulvaran ku a pidi wes pa e haña akseso na e “Bulkdata” ku Hulanda tin.

Nieuwe Haven, — Ayera den korte di promé instansha tabatin “regiezitting” di e kaso kontra e dama Stephanie Philips (nasé na St. Maarten) kende ta keda akusá di ta involukrá den e kaso “Themis”. Stephanie ta keda sospechá di ta kómplise den un kaso di asesinato ku tin di haber ku e organisashon kriminal NLS.

Ayera wes mr. van Lieshout a palabrá ku lo trata e kaso den su kontenido ku tur probabilidat entre 9 di mei pa 13 di mei 2022. Pero promé ku e fecha ei, lo tin otro “regiezitting” dia 15 di mart próksimo pa asina wak ku tur kos ta kla trata e kaso den su kontenido.

Primeramente, ayera abogado mr. A Sulvaran a pidi wes pa e por haña e “bulk data” (Original) ku Hulanda tin. Den “bulk data” aki, tin mensahenan i data di e telefònnan Kripto “pgp”. E abogado a splika ku den e “bulk data” aki tin masha hopi mensahe i data. E motibu ku e abogado ke e “bulk data” aki, ta motibu ku bo no sa delantá kiko tin di haber ku e kaso “Themis” i kiko no tin di haber ku e kaso. Di e forma aki, bo mes komo abogado, por buska pa asina saka afó kiko ta di relevansha i kiko no ta di relevansha pa ku e kaso “Themis” i naturalmente pa bo kliente.

Aktualmente di e “bulk data” aki, Hulanda ta hasi un selekshon, ku nan ta “kere” por ta relevante pa Hustisia na Kòrsou en general. Pues di e selekshon aki mes, bo no sa kua ta pa e kaso “Themis” i kua no. E abogado a bisa wes, ku si e no por haña primeramente, henter e “bulkdata” ku hulanda tin, e lo ta deseá di haña e selekshon kompletu ku Hulanda ta manda pa Kòrsou. Paso den nan, kisas tin mensahenan, ku netamente por kita e sospechoso di su kliente.

Si esaki tampoko ta posibel, e abogado a pidi wes, pa e haña tur e mensahenan i datanan, ku OM ta “kere” ku tin di haber ku e kaso “Themis” i tambe esnan ku spesifikamente OM ta “kere” tin di haber ku su kliente. Pues e abogado ke tur data i mensahenan di tur persona involukrá den kaso “Themis”, sea ku e sospechosonan ta na Kòrsou òf den eksterior. Por último e abogado a pidi pa skòrs detenshon di su kliente.

Despues di a pensa un ratu, wes mr. van Lieshout a tuma un desishon riba petishonnan di abogado mr. A. Sulvaran. Wes a splika e abogado ku e promé petishon, kual ta pa haña henter e “bulk data” ku Hulanda tin ta keda ningá. Esaki pa motibu ku tin masha hopi mensahenan i data di personanan ku no ta involukrá i ku no ta di relevansha pa e kaso aki. Na di dos lugá wes a ninga tambe pa duna e abogado akseso na henter e selekshon ku di e “bulk data” ku Hulanda ta haña tin relevansha pa Kòrsou i ku ta keda mandá Kòrsou. Segun wes, akinan tambe tin demasiado data i mensahenan di personanan ku no tin di haber ku e kaso.

Pa loke ta trata e di tres petishon, wes a bai di akuerdo pa e abogado haña tur data i mensahe ku OM ta “kere” tin di haber ku su kliente. Pa loke ta trata tur data i mensahenan di personanan ku tin di haber ku kaso “Themis”, wes a bisa ku e abogado no por haña esaki den e sentido ku OM ta mandé pe pero di otro banda, si e ke esaki, e por bai edifisio di RST, kaminda e datanan i mensahenan ta, einan si e por haña e akseso i lo por hasi su investigashon den e edifisio di RST.

Por último wes no a bai di akuerdo pa skòrs detenshon di abogado mr. A. Sulvaran su kliente.