Back to Top
Vigilante banner image

ACU rumbo pa un kooperativa fuerte


July 3, 2024 • 2 minüt pa lesa

WILLEMSTAD——Djadumingu 30 di yüni, ACU tabatin e promé reunion general di miembro segun e statuto aktual. E presidensia di e reunion tabata na man di e Gerensia, ku a sa di guiá e reunion den un esfera positivo, resultando na rekonosementu dor di sala na final di e reunion.

Tratamentu di algun puntonan importante

Durante e reunion general, ACU a trata dos punto importante ku ta resultado di 2023 i nombra miembronan den e komishonnan ku ta atendé interesnan di miembro.

E promé parti di e reunion a trata relato finansiero 2023. Gerensia i Hunta di Supervishon a duna un splikashon detayá di nan maneho finansiero pa e aña 2023. Den su presentashon Gerensia a elaborá ekstensivo riba e e karta ku a manda pa sosionan i tambe a presentá akshonnan fuerte ku ya kaba a ser tuma pa kobro agresivo di debe bieu i oumentá entrada di ACU. E miembronan presente a duna nan aprobashon na e maneho di e dos órganonan statutario i na e resultado di 2023.

Den e di dos parti di e reunion a pone na votashon e aprobashon di e miembronan pa e diferente komishonnan. Tur e kandidatonan a haña aprobashon. Ku esaki práktikamente tur kuerpo den e struktura nobo di ACU ta okupá di kual ta pendiente pa den e di dos mitar di aña 2024,  yena e funshon di direktor general i direktor finansiero di ACU. 

Den e struktura nobo di ACU, e partisipashon direkto di e miembronan den maneho di e kooperativa ta via nan representantenan den diferente komishonnan. Ta trata di Komishon di Nominashon di ACU, Komishon di Interes Kooperavista, Komishon Fondo di Hubentut i komishon Fondo pa Penshonado di ACU. 

Servisionan nobo i aktividatnan pa mucha i penshonado

ACU ta sigui kumpli ku su rason pa eksistí ku ta sirbi sosionan ku produktonan di nan interes. Den e kuadro ei resientemente a lansa hipoteká i habri un loan center kaminda e sosio por kana drenta sin traha sita pa pidi fiansa. Próksimamente lo selebrá luna di Abeguito kaminda nos lo tin programanan edukativo i di dibertishon pa nos muchanan i tambe anunsiá e bahada di interes riba fiansa.

I pa e penshonadonan keda pendiente pa dia 25 di yüli próksimo, kaminda ACU lo bai tene un happy hour pa tur su penshonadonan. 

Finalmente

ACU lo sigui krese ku e meta pa sigui prosperá huntu ku e komunidat ku e ta sirbi. ACU ta invitá tur sosionan en partikular i e komunidat en general pa partisipá den e plan i aktividatnan pa futuro.

Login