Advent práktikamente ta solushonando e problema di spesialistanan di wowo.

Pos Cabai,– Aña 2023 tabata un aña formal di retonan pa e spesialistanan di wowo. Diferente publikashon a konkluí ku un skarsedat serio di spesialisatanan médiko di wowo a sòru ku tabata tin un lista di espera peligroso na e hòspital nashonal di CMC.

Mirando e desaroyo di lista di espera largu pa pashèntnan ku problema ku wowo i un solushon duradero no por a keda ofresé dor di CMC, e minister enkargá ku salubridat públiko a pidi yudansa na hòspital Advent pa wak un posibel solushon. Advent ya a publika nan promé relato di resultadonan i a indiká ku na momentu ku nan a keda aserká e lsita di espera pa pashèntnan ku problema ku wowo tabata 525 pashènt. Algun di e pashèntnan tabata wardando mas ku 2 aña pa wòrdu operá na nan wowo.

E trabounan a kuminsá na novèmber 2023 i apénas dos dia ku e klínika nobo na Advent a habri, spesialisá den kuido di wowo, a resultá ku 742 petishon pa afsrpak a drenta. Den su totalidat, Advent a duna kuido na 4426 pashènt kaminda 55% tabata tin mester di solamente 1 tratamentu. 31% di e pashèntnan di wowo ku a bishitá advent mester a sigui bini na mas konsulta despues di a keda operá. I por último 14% mester a sigui bini Advent pa kòntròl rutinario di wowo. Tambe a publiká ku e hòspital a hasi 1802 operashon. Kaminda 80% tabata operashon pa kita katarata i 17% tabata operashon “vitrectomy” i 7% tabata operashon nan mas chikí di wowo.

Den su totalidat 7 spesialista di wowo a traha último 7 luna na e departamentu spesialisá den kuido di wowo. Ta trata di 6 spesialista lokal, 1 spesialista Mehikano ku tabata bula bai bini. Di e 6 spesialistanan médiko wowo, 1 spesialista tabata tin kòntrakt di labor ku Advent i e otro spesialistanan tabata tin nan própio klínika i tabata ehekutá solamente konsulta i operashon na e hòspital.