The Bottom,– Riba CNN.com den sekshon di “Featured” por nota ku e medio di komunikashon ta splika kon pa baha un avion riba e aeropuerto komersial mas kòrtiku na mundu. Segun CNN, si bo no tin e kurason, no bula bai Saba.
E isla BES ku ta situá ménos ku 30 mia for di kosta di St Maarten ta den notisia. E biaha aki, CNN ta splika, bahamentu di avion riba Saba ta un arte riba su mes. Aktualmente e aeropuerto di Saba, Juancho Yrausquin Airport, ta konosí di ta e airopuerto komersial mas kòrtiku na mundu ku un largura di 400 meter. Pa kompará, nos atleta YDK, Liemarvin Bonavacia ta kore e distansia aki den solamente 44 sekònde.
CNN ta agregá ku e pilotonan ku ta bula entre St Maarten ku Saba, ta risibí training spesial pa por baha i lanta avion na Saba. Aktualmente úniko kompania di aviashon ku por hasi esaki ta e kompania di aviashon na St Maarten mes, Winair.
Aktualmente e aeropuerto ta prosesá mas o ménos 30 mil pasahero pa aña, pero debí na Covid-19 esaki a baha pa mas ku 50%. Aktualmente e kantidat di pasahero prosesá ta oumentando, pero e no a yega e nivel pre-Covid ainda.
E artikulo yamá “What it’s like to land on the world’s shortest commercial runway” a keda publiká awe den oranan di mainta dor di reportero Nicola Chilton di CNN Travel.