WILLEMSTAD,- Areglo di disputa ta haltu atrobe riba agènda di Ipko otro siman. Parlamentario pa partido MAN, Giselle Mc William ta bisa ku un proposishon nobo ta kla i ta bai diskutí esaki pa haña a sosten nesesario pa e lei por kana su proseso.

Tambe e situashon di studiantenan di Karibe na Hulanda ta riba agènda pa e reunion di Ipko. Esaki a base di un rapòrt ku Ombudsman a traha riba e situashon di e studiantenan. Un punto prinsipal ku a bin dilanti den e rapòrt ta e asina yamá “BSN nummer” ku studiantenan di Karibe no tin i ta stroba nan pa establesé nan mes na Hulanda kreando difikultat pa nan por haña un apartamento òf habri un kuenta bankario. Debe di estudio ku studiantenan ta keda kuné ta otro punto di preokupashon.

Alabes parlamentarionan lo haña un presentashon riba kambio di klima a base di un rapòrt ku eks minister Ed Nijpels a traha. Den kuadro di desaroyonan di klima i energia renovabel e parlamentarionan lo hasi un bishita di trabou na un di e instalashonnan di energia hidrógeno na Hulanda.

Mc William a bisa ku herensia di sklabitut tambe ta riba agènda di Ipko. Den e kuadro aki parlamento di Kòrsou su posishon ta ku tur fondo di reparashon mester bai pa drecha sistema di enseñansa na Kòrsou. Relashoná ku otro preokupashonnan ku ta biba na Hulanda manera areglo mutuo, ehekushon di reformanan i bago bek di debenan di pais Mc William ta bisa ku frakshon di MAN durante di IPKO lo vosifera ku nan tin e mesun preokupashonnan ku ta biba den Tweede Kamer.

Mc William ta komprondé e preokupashon ku ta biba den Tweede Kamer riba e tópiko aki. “Si Kòrsou pèrdè e oportunidat pa logra pasa e reformanan manera palabra den e paketenan di pais Kòrsou ta “miss the boat”. Kontrali na Aruba i St. Maarten, Kòrsou ta kedando atras den su ehekushon.’

 Frakshon di MAN ke sa si ta polítika ta disidí di no pone urgensia tras di ehekushon di e reformanan òf ku ta pa falta di kapasidat gobièrnu ta keda atras, esta Mc William. E delegashon di Kòrsou ku ta partisipá na IPKo ta konsistí di Amerigo Thode (MFK) i Sheldry Osepa (PNP) klu a biaha pa Hulanda for di djaweps último. Djabièrnè presidente di parlamento, Charetti America Francisca 9MFK) i grefir Silvin Cijntje a borda avion rumbo Hulanda,. Awe djasabra Giselle Mc (MAN) i maña djadumingu Quincy Girigorie (PAR), Michelangelo ‘Lo’ Martines, Rennox Calmes (TPK) i Gwendell Mercelina (PNP) ta biaha pa Hulanda. Mercelina no ta forma parti di e delegashon ofisial di Ipko, pero manera semper ta asistí na e reunionnan riba gastu propio.