Grupo ku a risibí nan sertifikado den siman tras di lomba

Willemstad- Djabièrne último fundashon Veiligheidshuis Curaçao, ku ta kai bou di Ministerio di Hustisia, a entregá sertifikado na nuebe persona, ku a partisipá den un entrenamientu pa yuda agresornan den violensia doméstiko.

Segun e mènedjer di Veiligheidshuis Kòrsou, Viandrelica Narcisio, ora ta atendé ku tipo di kasonan manera violensia doméstiko, semper e enfoke ta bai riba kuido di e víktimanan. Masha poko bia tin tempu pa e agresor i pa atendé ku tur e problemanan tras di e agresividat. Pesei a bini ku e asina yamá ‘BORG training’. E meta di e training aki ta pa trese un kambio di komportashon serka e agresor, prevení ku e abuzu ta bolbe tuma lugá i yuda e agresor pa pensa kiko ta otro opshon nan ku e tin na lugá di violensia.

Kòrsou tabata tin mester di un training pa yuda agresornan, segun Viandrelica ta splika. E problema mester wòrdu ataká na su rais pa asina por wòrdu prevení i no solamente kuida e víktimanan i kastigá e agresornan. E training aki ta un training ku a bini for di Hulanda i ya ta wòrdu duná na Boneiru.

 Landelijke projectcoordinator huiselijkgeweld, Kirstie Schmitsz i Reclasseringswerker Bonaire, Desire Frans, tabata esnan kende a duna e training na e nuebe personanan aki na Kòrsou. E nuebe personanan ku a sigui e práktika aki tur ta bini di instansianan manera entre otro, UO reclassering, Stichting slachtofferhulp, Stichting Gezinsvoogdij instelling, Stichting AJJC, jeugdreclassering i tambe PSI Skuchami. 

Tambe Viandrelica a agregá ku ahinda e personanan ku a risibí e sertifikado aki lo no por duna práktika na otro hende ahinda. Awor aki nan lo sigui un trayektoria di 4 luna kaminda huntu ku nan organisashonnan, nan por skohe e kasonan pa praktiká e método aki, bou di supervishon. Despues di e periodo aki lo sinta na mesa huntu ku Boneiru i Hulanda pa asina yega na kapasitá mas hende pa duna e training aki.

Importante tambe pa menshoná ta ku e fondo pa e proyekto aki ta bini kompletamente for di Ministerio di Seguridat i Hustisia na Hulanda.