Back to Top
Responsive image
E korant di pueblo

Ainda no a lansá sertifikado digital di Covid-19


September 29, 2021 • 2 minüt pa lesa

Aun no tin indikashon ki dia lo lansa e sistema di sertifikado digital pa Covid-19 na Kòrsou.

PUNDA- E sertifikado digital di Covid-19 aun no a lansa na Kòrsou. Segun publikashon anterior, minister di salubridat a informá ku esaki lo keda implementá na Kòrsou sèptèmber 2021.

Algun siman pasá nos a informá ku minister di salubridat, Dorothy Pietersz-Janga, a duna di konosé ku e asina yamá Corona-app i sertifikádo digital di Covid-19 lo lansa na Kòrsou.

Minister Pietersz-Janga a informá ku pa di 15 sèptèmber e sertifikado digital lo mester lansa pa medio di un “soft launch” i pa fin di sèptèmber e asina yamá “health app” lo ta mester a subi merkado. Sinembargo, aun no tin ningun indikashon si lo implementá e sistema digital ainda i ki dia esaki lo ta.

Mirando desaroyonan di e sertifikado digital na otro islanan den reino Hulandes, por konkluí ku Kòrsou ta kana atras pa ku esaki. Manera ya nos a bin ta informá, hermana islanan Aruba i Sint Maarten ya a implementá e sertifikado digital di Covid-19 yamá DCC. E sertifikado digital ta duna informashon si un persona a bakuná kontra Covid-19, ta duna resultado di tèst negativo pa Covid-19 i tambe e ta fungi komo un sertifikado di prueba di rekuperashon despues di infekshon.

Paisnan Oropeo a sera un akuerdo pa por tin un sistema general ku tur pais den Oropa por verifiká status di bakunashon i pa veriguá tèstnan ku a keda hasí promé ku buelo pa por drenta un pais. E sistema aki a keda desaroyá den i yamá Sertifikado Digital di Corona pa paisnan Oropeo (EU DCC).

Komo ku Hulanda ta forma parti di Union Oropeo, e islanan den Reino tambe a haña e oportunidat pa forma parti di e sistema aki. E sertifikado digital (DCC) ta fasilitá biahamentu entre e paisnan ku ta forma parti di Union Oropeo.

Login