Back to Top
Vigilante banner image

Ainda no tin fecha pa Silvania kontesta parlamento riba eksonerashon 2017


May 20, 2023 • 1 minüt pa lesa

Javier Silvania

Punda,- Te ainda no tin un fecha pa minister di Finansa, Javier Silvania kontestá parlamento riba e minister desishon pa duna eksonerashon di debe di impuesto for di 2017 i mas bieu. E minister tabata siman pasá den reunion di Komishon Sentral i a duna un presentashon riba e situashon di kobransa di impuesto.

Pregunta kardinal ku vários parlamentario a hasi Silvania sinembargo ta pa e minister splika ta pa medio di kua base hurídiko el a disidí di duna eksonerashon. Tambe parlamentario Steven Croes di partido PAR a puntra e minister ta kiko e mes ta pensa di e señal ku e ta manda pa komunidat eksonerando debe di tur ku a eskivá impuesto den pasado. Algu ku segun Croes no por ta sinta bon serka tur esnan ku semper si a hasi nan máksimo esfuerso pa kumpli ku nan pago di impuesto.

Pa otro siman tin 3 dia di reunion di parlamento, pero riba niun di e dianan aki no a plania pa Silvania kontestá preguntanan riba di desishon pa eksonerá debenan bieu di impuesto. Tampoko presidente di parlamento, Charetti America-Francisca a informá parlamento ki dia si e minister lo ta bèk pa kontestá. E pensamentu general bou di miembronan di oposishon ta ku e minister su ko’i sinta ta na vlam, pero ku nan tin duda ku tin un mayoria den parlamento ku ta mara konsekuensia polítiko na esaki ni tampoko ku lo hasi un denunsiá di parti parlamento na Ministerio Públiko kontra loke ta mustra di ta un akto ilegal di minister Silvania.

Login