Ora e parti di legislashon pa manda but na kas ta kla lo manda e dokumentonan Parlamento pa tratamentu.

WILLEMSTAD – Un komishon konsistiendo di representantenan di e Ministerionan di Hustisia i di Tráfiko, Transporte i Planifikashon Urbano (VVRP) ta trahando ainda riba e legislashon pa por manda but pa kibradó di reglanan di tráfiko na kas.

 Ora esaki ta kla lo manda e dokumentonan Parlamento pa tratamentu. Asina Minister Charles Cooper a splika durante e reunion spesial di ‘Ora di Pregunta’ ku a tuma lugá, riba petishon di Parlamentario Amerigo Thodé.

Cooper a kontestá preguntanan relashoná ku ‘Seguridat den tráfiko na Kòrsou’, ku Thodé a hasi den un karta resientemente. Despues di e kontestanan, vários miembro di Parlamento a hasi un pregunta adishonal, ku tambe Cooper a kontestá. “Vragenuur” (Ora di Pregunta) ta un enkuentro públiko ku ta duna Parlamentarionan e oportunidat pa por pidi un minister pa bin Parlamento pa kontestá preguntanan riba kualke tema di aktualidat. Manera e nòmber ta bisa, e intenshon ta pa e enkuentro akí dura 1 ora.

Minister Cooper a para ketu na leinan di tráfiko pa por atendé ku esnan ku ta kometé infrakshon, manera lei pa por manda but kas pa doño di esun ku tin e plachi di number riba su nòmber. Echo ta ku Ministerio Públiko tambe pa algun aña kaba ta hasiendo kampaña na fabor di introdukshon di e asina yamá ‘kentekenaansprakelijkheid’. Den e kaso ei ta esun ku ta doño dje plachi di number ta responsabel pa infrakshonnan di tráfiko kometé ku e vehíkulo. Por graba e infrakshonnan di tráfiko ku e kámaranan, manera tin instalá riba Helmin Magno Wiels Boulevard. Pero esaki no ta den funshon, pasó lei no ta reglá. Ora lei ta reglá por manda e prosèsverbalnan ku un proposishon di pago direktamente pa e doño dje plachi’ number. Porlotantu lo no ta nesesario mas pa un agente polisial para e shofùr pa kada infrakshon i entregá e but na dje personalmente.

Ya ta eksistí formanan ‘kentekenaansprakelijkheid’ na por ehèmpel Aruba. E proseso legislativo p’esaki i e registro di plachinan di number ta andando na Kòrsou. Gabinete Pisas II ya a establesé un grupo di trabou ku ta hasiendo un estudio di tur leinan nesesario pa un implementashon legal na Kòrsou. I grupo di servisio mester hasi proposishonnan tokante e artíkulonan di lei ku mester modifiká, pero tambe tokante si mester introdusí leinan nobo.

Pa drecha seguridat den tráfiko, mester sera e burakunan den e lei di tráfiko i ehekutá e plan di ‘Seguridat di Tráfiko 2016-2023’. Minister Cooper a pone énfasis riba ‘Enforcement, Education and Engineering’. Pero e sistema di atendé infrakshon akí tin poko uso si esaki no ta legalmente reglá. Kòntròl riba pasamentu den lus kòrá òf kore ku velosidat muchu altu ta duna su frutanan, pero no tin sufisiente kòntròl. Esei tambe ta algu ku e Minister di Tráfiko ta lamentá.

Rotònde

Minister Cooper a para ketu tambe na e preguntanan di Thodé tokante rotònde. El a splika ku e plenchinan di tráfiko na Jongbloed i na Zegu lo bira rotònde. Nan ta parse di ta plenchi pero nan no ta. Na un rotònde esun ku ke subi e rotònde tin preferensia, pero na un plenchi di tráfiko ta e tráfiko biniendo di man drechi tin preferensia. Echo ta ku velosidat di tur den tráfiko ta baha na rotòndenan. Esaki ta hasi tráfiko na rotòndenan mas sigur. Pa e motibu akí ta bai hasi e plenchinan di tráfiko rotònde hopi mas kla pa tur hende. Lo bin e bòrchinan di tráfiko nesesario ku ta indiká kon mester kore esaki.

Buraku

E tópiko ku mas hopi tin hopi reklamo tokante di dje ta e kantidat di burakunan ku tin den kaya. Minister Cooper a para ketu na esaki tambe durante e ‘Ora di Pregunta’, ya ku e ta esun ku mas ta haa zundrá. No por lubidá riba su mama tampoko. Pero segun Minister Cooper entretantu e esfuersonan ku e ta hasi ta poko alivio pa lomba di su mama. Maske e ta risibí hopi reklamo, echo ta ku e úniko kos ku e por hasi te ainda ta aliviá sierto kaminda yenando e burakunan. Pero e kayanan grandi ta un otro problema. Di tur manera el a hasi un apelashon na tur esnan ku ta trafiká riba kayanan di Kòrsou, pa bai ku mas koutela.