WILLEMSTAD – Minister di Finansa Javier Silvania (MFK) ta informá ku e trabou di procesá “aangiften” pa 2022 ainda ta altu. E kantidat ta oumentando tambe ketu bai, debí na “aangiften” nobo ku ta drenta. Silvania a disidí ku mester kaba ku e trabounan akí mas lihé posibel i pa mas tardá final di aña akí mes. El a informá esaki por eskrito djaweps último na Inspekshon di Impuesto.

E Minister ya a manda un karta ku instrukshon dia 24 di òktober último i awó ke risibí un plan modifiká pa mas tardá 21 di novèmber. Hefe di Inspekshon di Impuesto Jamilia Isenia, lo mester indiká kon nan ta pensá di kaba ku tur trabou pendiente, inkluso di añanan anterior, durante e restu di e aña akí.

E proseso di pone “aanslag” ADAF lo mester tuma lugá no mas tardá ku 17 di novèmber, i e restitushonnan ta kla promé ku 22 di desèmber. Ademas Silvania ta deseá risibí un resúmen di produkshon aktualisá tur djaweps, huntu ku un plan detayá pa e simannan benidero. Esaki mester inkluí tur akshon adishonal ku Jamilia Isenia ta tuma pa monitòr e produkshon i tuma medidanan pa kumpli ku e “deadline” di final di aña.