Pa kuminsamentu di Mart, Air Belgium lo kanselá su buelonan pa Kòrsou.

Willemstad-  Aerolinea Bèlgika, Air Belgium ta duna di konosé ku pa kuminsamentu di mart 2023 lo anulá e liña di buelo pa Punta Cana i Kòrsou.

E asina yamá ‘driehoeksvlucht’ aki ta sali for di e aeropuerto di Brussel. Te ku mas o ménos medio yanüari lo tin buelo na tantu Kòrsou komo Punta Cana dos biaha pa siman.  Despues di esaki lo tin un periodo kaminda lo tin algun buelo en konekshon ku fakansi di fin di aña. Sinembargo pa 5 di mart lo eliminá tur e buelo nan aki.

E motibu pa e wèlga di buelo aki ta pasobra e preis di kombustibel i impuesto ta hopi haltu na Repúblika Dominikana, segun e relashonista públiko di Air Belgium. E ta splika ku e problema di e buelo pa Kòrsou ta ku no tin sufisiente pasahero ku ta bula non-stop for di e aeropuerto na Bèlgika.

“Punta kana ta un destinashon ku ta delikado na presio. Tin hopi demanda na buelonan barata. Pa aerolineanan Punta Cana ta un destinashon bastante karu. E preis di kombustibel i impuesto na Punta Cana ta esnan di mas karu den Karibe. Pa e motibu aki Air Belgium, meskos ku otro aerolineanan, a trese un rekorte den nan buelo nan pa e destinashon aki”, e relashonista públiko ta deklará.

Tambe Air Belgium a mira e nesesidat pa kambia e skema i baha buelo nan ku ta sali pa Boneiru. Na lugá di pone buelo nan pa hinter wenter, lo tin buelo solamente rondó di e temporada di pasku.

E echo ku Air Belgium ta anulá e buelo nan pa Kòrsou ta un sla mas pa e isla. Ya KLM a duna di konosé ku lo kòrta den e buelo nan pa Kòrsou i ku nan lo bula 1 biaha pa dia pa e destinashon aki, na lugá di 2 biaha. Gobièrnu di Kòrsou a duna di konosé ku pa motibu di e desishon di KLM aki e isla lo pèrde kasi 20 mion euro na entrada.

Anteriormente Minister Ruisandro Cijntje a splika ku na momentu ku KLM disidí di kambia su operashonnan esaki ta hasi nos doló. Por garantisá esaki mas ainda si e disidí di kanselá buelo. Pa e motibu aki Minister Cijntje ke kambia e direkshon di e diskushon. Mirando ku KLM ta un kompania privá i nan por hasi loke nan ke. Pues Kòrsou mester wak stratégikamente kon ta hasi pa kubri e ruta.

Minister Cijntje ta bisa ku nos mester kuminsá pensa diferente. E ta splika ku komo pais nos mester kuminsá wak mas leu. Segun e, e diskushon mester ‘shift’ i nos mester kuminsá pensa pa Kòrsou tin su propio Curaçao Airways di manera ku nos por bula nos propio ruta i salbaguardiá nos interes.