Fundashon Kitten Rescue Curaçao huntu ku Hotèlnan i resortnan a kuminsá ku un akshon pa sterilisá pushinan di kaya.

WILLEMSTAD,– Kontiki Beach Resort ta e di kuater empresa den kolaborashon ku Fundashon Kitten Rescue Curaçao. Huntu nan kier ta sigur di ku kada bes mas pushi di kaya no ta bin biba den nan resort.

Kontiki Beach Resort a invitá e Fundashon pa djòin e akshon, motivá pa e eksitoso resultadonan ku e Fundashon a logra na Blue Bay Resort, LionsDive Beach Resort i Coral Estate Resort.

E fundashon lo pone un lugá di alimentashon permanente riba e terenonan di e resort pa asina por haña tur e pushinan huntu pa kaptura nan, sterilisá nan i despues bolbe hiba nan na e lugá. E pushinan di kaya pues lo risibí kuminda i awa diariamente despues di keda sterilisá.

“E inisiativa nobo aki ta e úniko solushon korekto pa e problema general di pushinan di kaya na Kòrsou”, asina un bosero di e resort a duna di konosé.

E Fundashon Kitten Rescue Curacao ta hasi un yamada na otro hotèlnan i resortnan ku ta luchando kontra e problema di pushinan di kaya pa nan tambe tuma medida. E fundashon ta ofresé su yudansa pa implementá e eksitoso enfoke aki rònt Kòrsou. Esnan interesá pa manda un mail na [email protected] pa un sita sin niun kompromiso.