Firmando e kontrakt, Global a risibí derechi eksklusivo di uzo riba Turbina GT 9 di preshon haltu ku tin un base pa karga 195.MW i por traha riba Fuel Oil Líkido Destilá, HP Fuel Gas (Refinery) òf Gas Propano. E uzo ta inkluso tur ekipo eléktriko te ku 15KV i makinario di kòntròl

Isla—E kontrakt ku Refineria di Kòrsou a firma ku Global Oil Management, ta duna e kompania estado unidese derechi eksklusivo riba uzo di turbinanan, ku Aqualectra tabatin mester di dje. Esei e kontrakt ta spesifiká den Anekso A, unda ta preskribí ku eksaktitut kua mashin Global tin derechi riba dje.

Refineria di Kòrsou sea konsientemente on inkonsientemente, mediante su direktor Patrick Newton a neglishá interes di Aqualectra. Den e promé insiso di e kontrakt firmá entre Harry Sargeant i Patrick Newton, ta hasta menshoná produkshon di utilidat promé ku produkshon di asfalt. Segun e kontrakt, Refineria Isla komo propietario di e aktivonan riba tereno di Isla ta buskando un operador. E intenshon ta pa e propietario buska un operador pa invertí, ópera i mantené e aktivonan (mashinnan) den kuadro pa 1. Produkshon di stom, awa, elektrisidat i aire komprimí (utilidat) rekerí pa manehá di e aktivonan i 2. Asfalt i demas produktonan pero no limitá na fuel, gas, destiladonan, diesel gasoil i utilidatnan eksesivo derivá for di krudo òf otro produkto. E operador ta keda komo titular i propietario di tur produkto i utilidat produsí. Manera menshoná e kontrakt ta firma pa Harry Sargeant komo propietario di Global Oil Management.

Firmando e kontrakt, Global a risibi derechi eksklusivo di uzo riba Turbina GT 9 di preshon haltu ku tin un base pa karga 195.MW i por traha riba Fuel Oil Líkido Destilá, HP Fuel Gas (Refinery) òf Gas Propano. E uzo ta inkluso tur ekipo eléktriko te ku 15KV i makinario di kòntròl. Tambe Global a risibi derechi eksklusivo di Turbina GT 10 ku ta un turbina di gas ku kapasidat di 20.5mw ku ta traha riba traha riba Fuel Oil Líkido Destilá, Gas Propano. Tambe inkluso tur ekipo eléktriko i makinaria di kòntròl. Aparte di e turbinanan, Global a blòkia tambe tres mashin di “Reverse Osmosis ku un total di 270 Ton/ora. I huntu ku nan un kantidat di tanki pa almasen di awa. I pa produsí stom, un faktor di produkshon importante pa Aqualectra, Global tin derechi riba Ketel di Stom no 77 i no 80 kual ámbos huntu ta produsí 150 ton/ora. Klaramente aktividat di produkshon i almasen di utilidat, kual ta bin resultá ku Aqualectra tambe tabata uza, prinsipalmente den kasonan di emergensha.

Segun Patrick Newton, RdK “no tabata sa ku Aqualectra tabata uza e aktivonan menshoná den e kontrakt di Global. No ta keda nada otro, segun RdK pa Aqualectra paga lokual e kompania estado unidense ta súplika. E desishon di RdK pa tòg komprometé e mashinnan na Global Oil, sin restrikshon i akseso pa Aqualectra tabata un “shòk” pa konosedonan i ekspertonan den e materia. Ta un situashon lógiko ku e kontrakt di Global, ta hinka e kompania estado unidense den un posishon di 1. Paga hür pero 2. Kobra Aqualectra pa produkshon di utilidat.  Den otro palabra, Aqualectra ta paga Global dor di hisa tarifa. No por tradusí e dil di Global komo nada otro pa laga pueblo di Kòrsou pa sigur 3 aña paga Aqualectra pa Aqualectra paga Global i Global por paga su hür, na aproksimadamente 1.4 mion florin minimal mensual.