Akusado a sintá 109 dia pa ladronisia di 9 plachi di palu.

Willemstad—- Ayera e akusado Gilberto Sambo (1992) a presentá den korte akusá di a hòrta 9 plachi di Groove Pine for di riba e tereno konstrukshon di bibienda Vida Nova.

Tabata riba djasabra18 febrüari  2024 ku Polis a detené e sospechoso Sambo pa ladronisia di 9 plachi palu  Groove Pine riba e tereno di Vida Nova.   E akusado Sambo a deklará ku e dia ei e  bai trabou  pa hiba un betòn molen ku nan a fi’é ya ku e tabata trahando riba su  kas. Na e momento ei tabatin mas hende trahando riba e tereno na unda e la bai hiba e betòn molen. Segun Sambo debí ku e tabatin pèrmit di su doño di trabou kual ta Betonbouw pa bai ku e palunan e la hinka esaki den baki di e pikòp. . Ma hinka e palunan den e baki di pikòp.  Dado momento e manager kual ta señor Delanooy a yega serka i a bisa ku e kosnan no ta bai asina. Segun Sambo e no tabata kier a hasi mas problema i e la bai pone e palunan bek. Huntu ku Delanooy e la keda para trankil ta warda e personal di vigilansha i tambe polis. Na yegada di polis e la wòrdu detené pa ladronisia di e palunan i ta sera te dia di awe.

Segun Sambo trabou a keda warda dies dia riba dje pa ku su regreso pero despues ku dies dia a pasa i tabata sera ketu bai na e dun’é su retiro pa kual e la pèrdè trabou.  Segun Sambo e tabata riba un bon kaminda unda asta e la kuminsá traha su mes kas. Den pasado e la haña yudansa pa ku adikshon na droga pero ya e tin dos aña ku e no tin problema ku droga mas. Fiskal a mustra ku e akusado tin un karchi di kastigu basta pisa kual ta pone ku e ta un residivista i tabata den su periodo di prueba dia e la kometé e ladronisia pa kual e ta sera te dia di awe. Sambo a mustra ku e ta sera entre di yen hende frustra den Prizon miéntras e ta un shofùr di trùk i tambe un mashinista. Fiskal a haña ku e echo ta proba i ta yega na un demanda di  8 luna di kual 3 luna kondishonal durante periodo di prueba di 3 aña. Sigui guia di reklasering. Hues ta haña ku aki ta trata di un  echo kual  ta legalmente i konvinsentemente proba.  

Segun  hues e akusado mes a duna diferente deklarashon na Polis i tambe awe den Korte kual ta pone ku su deklarashon no ta masha kreibel mas. Hues a mustra ku ta hasi uso di e denunsia hasi komo e punto di salida. Ta trata di un ladronisia kompletá ounke e akusado a bai pone e plachinan di palu bek. Hues a splika ku bo tin un karchi di kastigu amplio i a yega di tabata den kontakto ku polis i Hustisia. Ounke hues a tene kuenta ku e akusado a  pèrdè trabou Enkonekshon ku e suseso. Na final Hues a yega na e konklushon ku e akusado a sinta sufisiente pa e palunan ku e la bai pa hòrta. Segun Hues e ta haña ku awe e akusado mester ta bek den libertat pero e ta haña un kastigu kondishonal. Hues a yega na un kondena di 240 dia di kual 131 kondishonal durante un periodo di prueba di 3 aña. Tambe e akusado mester sigui guia stipulá dor di reklasering. E akusado a sinta 109 sera pa 9 plachi di palu ku e kier a hòrta i ayera a rekobra su libertat.