Back to Top
Vigilante banner image

Algun karchi a sobra pa e di dos "E-Curacao" Business Seminar djasabra awor


May 6, 2022 • 2 minüt pa lesa

Willemstad,– E ekspektativanan ta haltu pa e di dos seminario di ‘marketing’ i negoshi esta ‘e-Curaçao Business Seminar ku ta tuma lugá djasabra awor dia 7 di mei den Curaçao Marriott Resort.

No menos ku 4 profeshonal internashonal lo kompartí nan konosementu ku lo yuda kada un persona pa mehorá nan strategianan komersial. Esaki lo yuda negoshi i organisashonnan tambe ‘non-profit’ pa komuniká mihó, bende mihó i duna un mihó servisio. Primoridialmente via kanalnan digital. Un oportunidat úniko pa Kòrsou mirando ku normalmente lo mester biaha pa atendé seminarionan di e nivel aki. Den e kaso aki e tim di Infinity Media i The Lab a traha duru ku sosten di diferente partner pa por trese e personanan aki for di eksterior pa kompartí nan konosementu.

Segun sr. Michael de Sola; direktor di Maduro & Curiel’s Bank, E-Curaçao Business Seminar ta trese profeshonalnan huntu pa trata un variedat di tópiko i esaki tin benefisionan komersial pa diferente sektor lokal. MCB komo un partner prinsipal ta honrá ku pa di dos biaha, e por ta parti di un seminario ku un konsepto asina dinámiko i na nivel internashonal.

Por konstatá ku for di diferente sektor tin bastante persona ku lo partisipá na e seminario djasabra awor. For di sektor di hospitalidat, finansas, seguro, servisionan, komunikashon, gubernamental i demas sektor. Esaki sigur ta un bon señal.  Importante pa kompartí ta ku despues di kada ‘speaker’ lo tene un ‘panel discussion’ ku diferente persona lokal. e.o Direktornan di kompania i ‘entrepreneurnan’ lokal ku ta hasiendo un bon trabou den e mundu komersial. Aki lo papia riba tópikonan lokal. E públiko naturalmente por hasi pregunta na e panelistanan.

Algun di e invitadonan ku lo hiba palabra ta Miri Rodriguez (USA) di e kompania renombrá Microsoft i tambe for di Merka sr. Carlos Gil ku ta outor di e buki ‘The End of Marketing’, nan lo elaborá riba Storytelling i alabes kon mantené un konekshon mas humano ku bo oudiensia. Gil i Rodriguez ta papia na diferente konferensia internashonal renombrá. For di Ulanda lo tin Martin de Boer. De Boer lo kompartí sekretonan kon pa pone bo negoshi krese na un forma lihé. Adishonalmente, e eksperto den ‘Cybersecurity’ Douglas Thomas Manell representando Digicel Business lo papia riba e rísikonan i kon pa protehá bo data kontra ‘cybersecurity’. 

Pues e invitashon ta keda pa no pèrdè e evento aki ku na 2019 tabata ‘Sold out’ i tur kos ta mustra ku esaki lo ta e kaso tambe.

Por kumpra karchi via e wèpsait di e seminario ku ta www.e-curacao.net, i tambe na Fun Miles (ku bo puntonan di Fun Miles òf kèsh), Van den ­­­Tweel i na Mensing’s Caminada. Pa kompania ku ta deseá di kumpra mas ku 5 karchi, por hasi esaki via e Sales Desk di E-Curacao via e-mail ecuracaobusiness@gmail.com.

E evento lo kuminsá 8or di mainta ku registrashon i pa 9or e promé presentadó ta subi tarima. Nos ta rekomendá pa hasi uso di area di parkeo di WTC.

E evento tin komo sponsor: Maduro & Curiel’s Bank, Fast Delivery Services, Digicel Business, Guardian Group Fatum, BDO, Caribbean Identity CICC, C3, Key Caribe, Seguros Brouwer, Massive Productions i ta produsí pa The Lab Digital Marketing Agency i Infinity Media.



Login