AMSTERDAM—Reshèrshi a detené 10 persona den un investigashon di froude ku hipotek i labamentu di plaka.

Ta trata di personal ku ta traha den benta di kas i konseheronan di hipotek. E grupo ta varia den edatnan di 23 pa 45 aña. Banda di froude ku hipotek, nan ta keda sospechá di labamentu di plaka, estafa i falsifikashon di dokumento. E sospechoso prinsipal tabata hasi froude ku hipotek riba gran eskala, segun polis. E tabata usa informashon di entrada falsifiká, relatonan anual inkorekto i kontratonan di trabou fiktisio. Hopi di su klientenan ta migrantenan laboral. Den e investigashon polis a tene entrada den 9 edifisio na Amsterdam, Almere, Badhoevedorp i Zaandam. Ta trata di un kantor di makelar, kantornan di konseho hipotekario i kantornan di atministrashon. Tambe polis a kontrolá 7 kluis, den kua tabatin vario artikulo di luho manera oloshinan, prensa i plaka kèsh.