Ans Rietstra

Zeelandia— Helmoed Wierda, kende tabata Team Chef na RST mester baha durante promé mitar di 2023. Helmoed Wierda, kende a bini for di Rotterdam Hulanda ta e di 4 Hefe di Tim na RST.

For di òktober 2010, Kòrsou nunka no a konosé un Hefe di Tim lokal na RST. Ans Rietstra, kende tabata eks komisario di polis i despues gerente na Pro Rail, ta bira e siguiente Team Chef na RST.

E posishon di Hefe RST, tei ainda a keda okupá pa ulandesnan oropeo. Hefe Lokal di Kuerpo di Polis no tin niun outoridat ni tampoko kòntròl riba su maneho. Aparte di Hefe di Polis, Minister di Hustisia tampoko no tin muchu influensha den lokual e team chef di RST ta hasi. Esaki nunka, Minister di Hustisia no tabatin poder ehekutivo riba e hefenan ulandes oropeo na RST. Eks minister di Hustisia Kade Wilsoe a konfirmá e informashon aki na Vigilante. “Komo eks minister di hustisia mi sa kon RST ta traha”, el a duna di konosé. Lokual ta fortalesé RST mas tantu, ta e konseho di Komishon Begina riba Lei di Konsenso di polis, pa duna RST e tarea di e unidat di GVP, kual unidat nunka a bira un realidat. GVP a wòrdu diseñá pa krea un unidat di kòntròl presupuestario i di material den kuerpo di polis. Mando Polisial, saliendo for di Tim di Maneho ta sin kòntròl riba lokual ta tumando lugá den unidat di RST. Esaki ta un situashon di hopi aña. Último ministernan di Hustisia for di Kade Wilsoe, Nelson Navarro, Quincy Girigorie i awor Shalten Hato tur por konfirmá esaki.

Segun un deklarashon di eks minister Kade Wilsoe, no tin niun kòntròl riba nan maneho. RST, for di 2010 ta wòrdu protehá bou di e kapa lei di Konsenso di Polis. E situashon sin kòntròl último añanan a krea e posibilidat pa RST indirekt por paga kompanianan eksperto pa ehekutá investigashonnan forensiko sin outorisashon di Mando di Polis. Ta un hecho ku e leinan di konsenso, inkluso esnan hudisial,  a wòrdu ofisialisá sin pensa riba nan implementashon.

E Lei di Konsenso di Polis a resultá un frakaso durante ehekushon, pero di otro banda e la poderá influensha hulandes oropeo den rangonan di Kuerpo di Polis. Unu dje desaroyonan tabata ehekushon di TBO. Team Bestrijding Ondermijning. E Grupo di Tarea, TBO, a bira mas potente miéntras a inkorporá e grupo komo un pia fiho den struktura di RST. Huntu ku e kambionan, TBO a haña tambe nan mes unidat di inteligensia. Te ku awe, ningun minister di hustisia ni tampoko Maneho di Kuerpo di Polis no tin konosementu den e maneho na TBO. TBO ta trata di un team di Ministerio Públiko (OM), bou di responsabilidat direkto di Prokuradó-General (PG) di Kòrsou, Sint Maarten i islanan BES. Ta trata di un team ku ta atendé ku krímen ku ta mina i ta konta ku partisipashon di entre otro polis (KPC), Recherche Samenwekings Team (RST), Koninklijke Marechaussee, Kustwacht, Douane Curaçao, Veiligheidsdienst Curaçao (VDC) i Ministerio di hustisia di Kòrsou.

En realidat, TBO ta wòrdu manehá pa e Team Chef di RST, kende e siguiente tambe ta un ulandes oropeo.Ni Minister di Hustisia i tampoko Team di Maneho di Kuerpo di Polis tin influensha riba e Team Chef di RST. RST ta uza, eks funshonarionan di RST kendenan a lanta na mes kompania privá na Kòrsou, pa hasi investigashonnan forensiko. Esaki ta posibel, sin outorisashon di minister i di hefenan lokal di polis, debí ku RST su struktura ta skonde tras di 3 Lei di Konsenso, Polis, Ministerio Públiko i Korte.