Ousilio:15 di sèptèmber 2021 Minister di Salubridat a risibí un karta di CMC ku ta informá ku AO bou di personal lokal a oumentá ku 35%.

Fòrti – Segun un karta ku CMC a manda pa Minsiter di Salubridat 15 di sèptèmber último, e personal di hòspital ta hopi agotá. Esaki por resultá ku pashèntnan lo mester wòrdu referí na hospitalnan den eksterior pa por sigui haña kuido nesesario.

Na 2020, e pandemia COVID-19 a hasi su entrada na Kòrsou i e gobièrnu anterior a tuma medida nesesario pa salbarguadia nos komunidat. Un di e medidanan tabata pa aloká Covid-19 pashènt den edifisio di SEHOS. Aunke ku SEHOS tabata kla pa risibí e pashèntnan, gobièrnu anterior a tuma e desishon pa mantené e Covid-19 pashèntnan den CMC mes. Esaki a pone ku CMC mester a baha su kuido elektivo pa asina duna tur atenshon na kuido di nos pashèntnan di Covid. Pa yuda paga gastunan èkstra relashoná ku kuido pa Covid, CMC a haña 4.8mion florin di gobièrnu di Kòrsou durante 2020.Tambe CMC a risibí yudansa den forma di personal di kuido i material for di Hulanda tantu na 2020 komo 2021. Mas aleu, sèptèmber 2021 CMC a risibí 1.9mion florin adishonal repartí den 3 tranche pa kubri gastunan di e personal adishonal.

Durante e siman, Minsiter di Salubridat a risibí un karta di CMC ku a kai manera un bòm. Esaki ta lokual Minister di Salubridat Janga-Pietersz a splika durante e konferensha di prensa. Den e karta, CMC a hasi petishon pa finansiamentu adishonal pa aña 2021. Tambe CMC a informá ku AO bou di personal lokal a subi ku 35 porshento. Esaki apesar ku tin ayudo adishonal di personal di Hulanda. Konsekuentemente kisas lo mester transportá pashènt pa eksterior.

Segun presupuesto di CMC, na aña 2021 CMC a pidi 206mion florin di kual 184.5mion SVB lo kubrí. Den e karta ku Minister di Salubridat a risibí 14 di sèptèmber último, produkshon te ku fin di ougùstùs 2021 ta na balor di 164.3mion florin. Pues, di sèptèmber 2021 te ku desèmber 2021, a sobra un suma di 20.2mion florin. Segun CMC esaki no ta sufisiente mirando ku e gastunan pa kuido mensual tin un average di 5mion florin mas tantu di lokual tin presupuestá. Tambe a menshoná ku ta importante pa tuma nota ku den e 184.5mion florin di SVB, no ta inkluí e 18mion na pago di speshalistanan na CMC.

Pues, CMC ta konkluí ku entrante 22 di sèptèmber 2021 lo bai ta hopi difisil pa por sigui duna kuido elektivo te ku fin di aña 2021. Konsekuentemente lo resultá den un retraso riba e lista di espera. Mas aleu, CMC lo tin mester di adishonal 5.3mion florin mensualmente pa kubri gastunan di kuido. Tambe CMC a splika ku mester kuminsá prepará pa e posibilidat di transportá pashènt pa eksterior pa nan  sigui risibí kuido.