Back to Top
Vigilante banner image

Apertura di Kòrsou su temporada 2025 di atletismo


January 8, 2025 • 2 minüt pa lesa

Apertura di temporada di Atletismo 2025 ta tuma lugá e wikènt.

Brievengat– Apertura di temporada di Atletismo 2025 ta tuma lugá e wikènt. E evento riba pista ta organisá pa e Federashon di Atletismo Kòrsou. E apertura ta kuminsamentu di un temporada nobo yen di talento, ambishon i unidat.

E kompetensia lo kuminsá riba djabièrnè 10 di yanüari na 6:00 anochi, ku un programa interesante di kareda, salto, i lansamentu. Durante e anochi lo tin un pousa kòrtiku pa e seremonia di apertura, un momentu spesial unda atletanan, coachnan, i ofisialnan lo ta den e spotlight, i lo hasi un promesa kolektivo pa honrá e spíritu di sportivismo i ekselensia.

Seremonia di apertura ta 7:00 anochi: Un selebrashon di dedikashon atleta i unidat, ku ta mustra e komunidat deportivo di Kòrsou i nan aspirashon pa un temporada nobo. Lansamentu djasabra: Coach Nelson Braafhart ta hasi un yamada na e fanátikonan di lansamentu pa yega na e área di lansamentu na banda ost di stadion, entre 9:00 i 11:00 di mainta, pa wak atletanan di Kòrsou den akshon ku hopi sorpresa

Den spotlight: Medayista di Carifta Games manera Zha-Zha Frans, Sdeway Zhuang i Dena Marie Barby (ganadó di kopa Beto Adriana 2023. Alabes lo tin diferente atletanan prometedor den kompetensia manera Raminge Laker de Windt, Zion Sambo, Jurivienska Koster, Tylor Otto, Levai Juliana i hopi mas; tur ku nan ambishon pa demostrá nan kapasidat i kalifiká pa kompetensianan internashonal. E evento aki lo ta konta tambe ku partisipashon di Vanessa Mercera, ganadó di Kopa Beto Adriana na aña 2020, ku ta bini direktamente for di merka pa duna mas realse na e apertura di e temporada.

Partisipantenan di Aruba i Boneiru lo agregá tenshon i reta atletanan di Kòrsou pa duna nan mihó di nan mes. “E temporada akí no ta solamente tokante kompetensia; e ta tokante komunidat i inspirashon,” segun Jairo Duzant, e kapitan di hopi di e atletanan prinsipal. “Nos atletanan ta determina pa kalifiká durante e pa CARIFTA Games i inkluso pa e Kampionato Europeo U20. Nan a traha duru, i nos ta eksitá pa wak nan briya.”

Federashon di Atletismo Kòrsou huntu ku patrosinadònan; MCB, Churandy Martina Foundation, Powerade, Curaçao Activities ta invitá tur hende pa akudí na e emoshonante Apertura di temporada 2025 di atletismo. Bo por kumpra na entrada na rason di: Pakete di dos (2) dia Ang. 5 pa adulto I Ang. 3 pa mucha te ku 12 aña.

Login