Back to Top
Vigilante banner image

Aqualectra a hasi entrega di donashon “Danki na bo”


June 21, 2021 • 2 minüt pa lesa

Willemstad –  Aqualectra resientemente, a hasi entrega di e donashon “Danki na’Bo” komo parti di su kampaña di kompensashon, na nòmber di komunidat.  Klientenan a aportá na hasi un donashon na organisashonnan sosial dor di duna e kompensashon ku di otro forma nan lo a risibí for di Aqualectra. 

Un komishon di evaluashon independiente a hasi un eskoho for di 17 organisashon ku a entregá un petishon bon argumentá i ku a eksaltá den e kategorianan di medio ambiente, hubentut, deporte, arte i kultura.  E organisashonnan ku a risibí un donashon ta CARMABI, Fundashon Stripan, Curaçao Karate Bond, Fundashon Bos di Hubentut, Children’s Museum Curaçao i Fundashon Reskate di Kultura.

“E kampaña “Danki na’Bo” ta resultado di loke Aqualectra a pasa aden pero tambe e indulgensia i aporte ku komunidat a demonstrá na e momentunan difísil. P’esei a bin ku e kampaña kaminda komunidat mes por a partisipá i a brasa e oportunidat pa duna bèk.  E reakshon entusiasmá aki pa duna bèk a sorprendé nos positivamente. Aqualectra ta kontentu di por a sirbi komo katalisadó den esfuerso di nos tur den komunidat pa duna bèk na organisashonnan ku ta hasi trabou importante na bienestar di nos komunidat,” Gerente General di Aqualectra Darick Jonis a bisa durante di su introdukshon.

Sra. Neysa Isenia, Gerente Finansiero di Aqualectra na su turno a ilustrá ku e aktitut demostrá pa e organisashonnan sosial ta muestra di loke na ingles ta yama ‘resilience’ (kai, bolbe lanta i sigui pa dilanti) loke ta e tema di Aqualectra su kuenta anual di 2020.  E organisashonnan, meskos ku Aqualectra den 2020, konfrontá ku e pandemia a demostrá di tin vishon, kompostura, rasonamentu, planifikashon, perseveransia, kolaborashon i esfuersonan pa kuida pa keda salú. 
Danki na pueblo di Kòrsou ku awe por gradisí e organisashonnan karitativo pa e trabou duru realisá.  Isenia a bisa ku ohalá esaki ta e promé paso pa e aña aki bini ku mas kos positivo pa nos komunidat.

Login