Willemstad-  -Despues di a konfrontá un ‘black out’ djaluna 4 di yanüari den transkurso di 2’or pasá di atardi, Aqualectra a logra pa restablesé suministro di koriente pa Kòrsou kompletu alrededor di mitar di 9 di anochi. Gerensia ta lamentá ku apesar di a implementá diferente medida di prekoushon basá riba resultadonan i rekomendashonnan ku a sali for di e investigashonnan hasí despues di e seri di ‘black out’ ku a surgi na luna di desèmber último, no a logra pa evitá un siguiente ‘black out’.

Investigashonnan preliminar ku nos tim di téknikonan a hasi ta duna indikashon ku un biaha mas a surgi inregularidat den e sistema di protekshon ku a kita un planta for di e ret i kousa e ‘black out’. Despues di a reuní tokante e kousa di e black out aki, nos téknikonan a inisiá mesora ku esfuersonan pa start unidatnan di produkshon di koriente pa por a restablesé suministro di koriente. Apesar di a sigui un proseso kuidadoso pa perkurá un siministro di koriente stábil i sostenibel, Aqualectra a hasi su máksimo esfuerso pa por restablesé e ret di koriente kompletamente mas lihé ku ta posibel.

Aktualmente Aqualectra ta sigui monitòr e ret di koriente pa por garantisá kontinuidat di e suministro di koriente. Nos ta nota ku e voltahe den e ret di transporte ta haltu, sinembargo esaki lo no tin impakto riba nos klientenan.

Resultado investigashon ‘black out’ 7 di desèmber

Entretantu gerensia a risibí e resultadonan di e investigashon ku hunta di komisario i minister di Desaroyo Ekonómiko a laga hasi. Nos por informá ku ya a hasi ahustenan basá riba e resultadonan i investigashonnan pa por evitá ku un ‘black out’ lo por bolbe surgi. Adishonalmente, nos tim di téknikonan lo sigui hasi investigashon pa konstatá e kousa rais di e ‘black out’ ku a tuma lugá djaluna 4 di yanuari 2021.

Komo kompania di utilidat Aqualectra ta sigui hasi su máksimo esfuerso pa evitá ku e akontesimentu aki ta ripití su mes, sinembargo Aqualectra no por duna garantia ku un ‘black out’ lo no surgi atrobe. Aqualectra ta pidi su sinsero diskulpa na komunidat pa tur molèster kousá pa e seri di ‘black out’ ku a tuma lugá últimamente. Nos ta konsiente ku kada ‘black out’ tin su impakto riba nos komunidat i ta inventarisá di ki manera por atendé esaki mas pronto ku ta posibel.