Neysa Isenia: Aqualectra no por afòrt lokual Global ta súplika i mester protehá

Isla—Un karta di direktora na Aqualectra, Neysa Isenia ta urgi Gobièrnu di Kòrsou pa intermediá den un problema ku a surgi entre Global Oil Management/ Refineria di Kòrsou i Aqualectra. Si no bini un intervenshon i Gobièrnu urgi Refineria di Kòrsou pa tuma e pasonan nesesario, Global Oil Management lo kobra Aqualectra “karu’ pa uza turbinanan ku awor ta na nan disposishon riba tereno di Isla.

Ta trata di kapasidat nesesario pa Aqualectra por garantisá pueblo i komersio di Kòrsou ku koriente na tarifa di kustumber. Pero pa por uza e kapasidat aki, Aqualectra mester a sinta na mesa ku Global Oil pa negoshá “preis” ku Global Oil lo kobra pa e kompania estatal di utilidat por uza fasilidatnan ku ta propiedat di Kòrsou! E negosiashonnan entre Global Oil i Aqualectra a pega, i Neysa a manda un karta pa Promé Minister Pik Pisas unda e direktora ta urgi pa un intervenshon pa evitá oumentá di tarifa di utilidat na Kòrsou. Si Global Oil insistí riba nan posishon, Refineria di Kòrsou kende a firma e akuerdo ku Global Oil no tin opshon i Aqualectra por skohe entre sea pa kuminsá skakel entre barionan di Kòrsou kada 2 ora òf paga Global Oil i konsekuentemente okashoná un oumentá drástiko den preisnan di koriente i awa na Kòrsou.

Konforme e akuerdo firmá entre Global Oil i Refineria di Kòrsou, nan tin akseso na kapasidat di produsí energia nesesario pa produsí koriente. Global ta bisando Aqualectra e kapasidat èkstra ku nan tin, Aqualectra mester paga pe na un tarifa ku Aqualectra no por afòrt ni tampoko Pueblo di Kòrsou. Si Aqualectra paga e tarifa ku Global Oil ta pidiendo, Aqualectra lo hiba pèrdida i no por finansiá esaki. Refineria di Kòrsou ta konsiente di esaki, pero e kompania no ta dunando Aqualectra sosten i den un karta na Gobièrnu di Kòrsou nan a mustra esaki klaramente.

Refineria di Kòrsou a konsehá pa laga Aqualectra paga e tarifa súplika pa Global Oil. Segun Aqualectra esaki ta inaseptabel. Den nan karta nan a splika Gobièrnu ku Global Oil ta un kompania priva dirigí riba hasimentu di negoshi i ganamentu di plaka. Neysa  a splika bon kla den su karta ku esaki no ta un opshon pa Aqualectra ku ta un kompania estatal ku meta prinsipal pa suministrá utilidat na preis ekonómiko na pueblo. Den su último frase, Neysa Isenia a splika Hunta di Minister pa intervení mas lihé posibel, pasobra si Aqualectra keda obligá na paga e tarifa di Global, preis ku pueblo ta bai paga pa koriente ta bai bira mas haltu.