Back to Top
Responsive image
E korant di pueblo

Aqualectra tei kaduká meternan ku no ta den uso pa prepará pa inovashon


May 17, 2021 • 2 minüt pa lesa

Willemstad—— Aqualectra ta dal un siguiente paso pa redusí su gastunan operashonal i tambe kuminsá prepará pa introdukshon masal di su meternan inteligente i di futuro.  P’esei klientenan ku tin un konekshon di meter di awa òf koriente, ku pa e último 12 lunanan no tabata tin konsumo riba dje, tin te dia 30 di yüni  próksimo pa indiká na Aqualectra ku nan ta deseá di mantené e konekshon aktivo

Aqualectra lo hasi su máksimo esfuerso pa notifiká e klientenan ku tin meter di awa òf koriente ku no tin konsumo pa último 12 lunanan, atrabes di un karta ku Aqualectra lo manda pa nan den e próksimo dianan.  Ta pidi tur e klientenan ku lo ta deseá pa keda ku e meter y konekshon tòg, pa indiká esaki na Aqualectra pa medio di nos sentro di kliente 0800-0135.  Den kaso ku no tin reakshon pa fin di yüni, Aqualectra lo tuma e pasonan nesesario pa  pa retirá e meter i kita e konekshon.  En total ta trata aki di 4.995 meter di awa, 2.426 meter di koriente Pagatinu i 749 meter di koriente konvenshonal.   Konekshon ku no ta den uso, ta representá inefisiensia i un peso finansiero pa Aqualectra i konsekuentemente pa nos tur.

Klientenan ku tin meternan di awa òf koriente ku nan no a usa pa 12 luna òf mas, tin 6 siman pa reakshoná. Por reakshoná dor di traha un sita via di e wèpsait (www.aqualectra.com) òf yama nos na 0800-0135 i primi opshon 3, i indiká ku bo ke traha un sita. Den kaso ku Aqualectra no risibí reakshon di parti di e kliente promé ku e fecha 30 di yüni, Aqualectra lo kita e meter i e konekshon fihá na esaki. Si e kliente ke habri un konekshon despues atrobe, lo e mester entregá un petishon nobo pa un konekshon.

Aqualectra ta spera di por haña reakshon di tur kliente ku risibí un karta òf ku tin un konekshon di awa i koriente ku no ta den uso.  Di e forma aki nos ta yega na un ret di distribushon di awa i koriente kaminda ta sigurá mas presishon i  informashon aun mas kla i korekto. Di e forma aki Aqualectra por dal e próksimo paso pa krea e ret di distribushon sabí, kla pa futuro instalando un meter inteligente pa abo tambe.

Login