ORANJESTAD – Promé Minister Evelyn Wever-Croes ta anunsiá na e komunidat di Aruba, ku lo habri e frontera marítimo ku Venezuela kuminsando dia 1 di Mei, 2023. Promé Minister a indiká ku e kondishonnan ta konosí y e dokumentashonnan nesesario a wòrdu risibí. E

kondishonnan ta hopi estrikto y tur e departamentonan konserní ta kla pa por atendé ku e re-apertura di e frontera marítimo.

ku esaki, barkunan por bin for di Venezuela segun prosedura palabra. Outoridatnan lokal lo tin tur informashon nesesario promé ku e barku sali di Venezuela. ku e informashon aki, outoridatnan lo sa ken ta bin, ki barku ta bin, y ki produkto lo ta tresiendo Aruba. E tripulantenan lo keda na Barcadera y no ta permití pa sali di e waf. Den pasado e tripulantenan tabata permití di drenta y bende nan produktonan, pero ku e kondishonnan nobo esaki no ta posibel. Nan ta bin riba responsabilidat di un agente ku lo tuma e karga di nan, y perkurá pa bende nan. Nan ta permití pa keda pa un maximo di 2 dia pa despues sali rumbo bek pa Venezuela.

“Mi ta spera ku e desishon aki pa habri e frontera marítimo lo yuda pa asina por trese e alivio nesesario pa e pueblo di Aruba. Gobièrnu lo sigui ku e prosesonan pa loke ta trata e frontera aéreo y lo  mantené komunidat informá di tur e desaroyonan pa ku esaki,” Promé Minister a ekspresá.