ORANJESTAD – Djabièrnè mainta, Promé Minister a reuní ku e komishon ku ta enkargá ku e re-apertura di frontera ku Venezuela pa haya un idea riba e status di e petishon hasi pa ku e dokumentonan nesesario pa por habri e frontera marítimo, dia 1 di Mei 2023.

Manera Gobièrnu a anunsiá siman pasa, Aruba ta dispuesto pa habri frontera marítimo ku Venezuela riba dicho fecha si risibí e dokumentonan y kumplimentu di e kondishonnan promé ku 31 di Mart 2023.

Gobièrnu ta lamentá ku e dokumentonan no a wòrdu risibí manera akordá, pero Aruba a wòrdu notifiká si ku Venezuela ta trahando ainda riba nan. Unabes ku Aruba risibí esakinan, lo verifiká ku tur e kondishonnan ta wòrdu kumpli. Den transkurso di e dianan, Aruba lo ta preparando mas mihó y mas intensivo pa si a kaso haya e dokumentonan di Venezuela, lo por habri e frontera marítimo ku Venezuela pa 1 di mei 2023.

Pa loke ta trata e frontera aéreo, Aruba ta trahando riba un análisis di e riesgonan pa asina por yega na un solushon y/òf bin ku un kambio di maneho òf lei pa por akapará kada un di nan. Pa esaki Gobièrnu no por duna un fecha ainda.

“E fecha di apertura di e frontera marítimo, Gobièrnu a duna algun siman pasa. Sinseramente e ta lamentabel ku awe, dia 31 di mart, Aruba no a haya e dokumentonan nesesario. Mi ta skohe pa keda optimista ku Gobièrnu lo risibí e dokumentonan di Venezuela pronto, pa asina por informá komunidat di Aruba si lo kontinuá ku e apertura di e frontera marítimo riba e fecha menshoná”, promé Minister e ekspresá.